اسلام آباد۔ 17 مئی (اے پی پی) مزن وزیر ءِ ھاسیں کمکار برائے اھوالکاری ءُ شنگ کاری ڈاکٹر فردوس عاشق اعوان ءَ گوشت کہ مزن وزیر عمران خان روایتی سیاستدان ءِ رن ءَ کسانوکیں پالیشی ءِ مٹ ءَ یک گواچنی لیڈر ءِ بستار ءَ ملک ءُُ راج ءَ را دراج بُریں سیتی پالیشی آنی سر ءَ کار کنگ ءَ انت ایشانی تہ ءَ ادارگ آنی تہ ءَ کار، معیشت ءِ برجمی ءُُ چاگرد ءِ ھمزوریں تبک ءِ گہبود ءَ را اولی ترجی انت۔ اپوزیشن کشاں چیل ءِ سیاست ءِ مٹ ءَ ارزشتی ایں راجی کارآنی پد ءَ حکومت ءِ گوما ھمگامی ءَ کار بکنت، 8ماہ ءِ حکومت ءَ چہ 70سال آنی ھساب گرگ بوت کنت۔ مزن وزیر عمران خان ءِ راجی سیت گیش دوست اَنت، ڈاکڑ ءِ نیاد ءِ تہ ءَ برز ءُُ جھلی سائنسدان بنت ءُُ گپ ءُُ تران کنوک آں اسل ءَ الس ءِ ھون چونسیتگ ءُُ ملک ءَ را 21 ہزار ارب ءِ وام بڈ ءَ داتگ ملکی معیشت ءَ را ڈگار ءَ جتگ، اے پی پی پاکستان ءِ جوانیں پجار ءِ سہرا کنگ ءِ واستہ ھمک جاھ ءَ پاکستان ءِ نام ءُُ شان ءَ برز کنگ ءَ پیسر انت، اھوالکار ءُُ میڈیا ورکرز آناں انصاف جان سلامتی کارڈ ءُُ نوکیں پاکستان ہاؤسنگ سکیم ءَ شریکدار جوڑ کنگ بیت بنگیج اے پی پی ءَ گوں کنگ بیت۔ آ آدینگ ءِ روچ ءَ راجی ھال رسانکی ادارگ ایسوسی ایٹڈ پریس آف پاکستان (اے پی پی) ءِ تر ءُُ تاب ءِ موہ ءَ گشتانک کنگ ءَ ات۔ سیکرٹری اھوالکاری ءُُ شنگ کاری شفقت جلیل، ایم ڈی اے پی پی طارق محمود خان، ڈائریکٹر نیوز شفیق قریشی، اے پی پی ایمپلائز یونین ءِ صدر شہزاد علی اکبر ءَ ھوار اے پی پی ملازم آنی مزنیں کساس ءِ اے موہ ءَ سر ءَ ساڑی ات، ڈاکٹر فردوس اعوان ءَ اے پی پی ءَ پجگ ءِ پد ءَ آئی ءَ را جوانیں رنگ ءَ وش اتک کنگ بوت۔ مزن وزیر ءِ ھاسیں کمکار ڈاکٹر فردوس عاشق اعوان ءَ گوشت کہ وزارت اھوالکاری ءُُ شنگ کاری ءَ چارج ءِ گرگ ءَ پد مزن وزیر عمران خان ءِ پنت ءُُ شون ءِ پد ءَ ادارگ ءِ تہ ءَ گہتری آرگ ءَ انت، ایش انت مزن وزیر عمران خان ءِ ویژن ءُُ ایجنڈا آنی بھر، اے لیکہ، روڈ میپ ءُُ سسا زوران ء َ اے پی پی ءِ ھاسیں تر ءُُ تاب ءَ اتکگ آں۔ آئی ءَ گوشت کہ درستانی واستہ کلوہ انت کہ اے پی پی یک گل ءُُ ھاسیں مردمے ءِ نام نہ انت بلکینگ ءَ پاکستان ءِ ادارگ انت، اے پی پی ءِ حکومت آنی گوما سیادی دارگ ءَ چہ گیشتر پاکستان ءِ گوما مھکم تریں سیادی انت، پاکستان ءَ را درستاں چہ گیشتر اے ادارگ ءِ ضلورت انت، سرجمیں دگنیا ءَ پاکستان ءِ ھرابیں لکا ءَ را جوان ءُُ شریں رنگ ءَ مٹ کنگ ءَ اے پی پی وتی زمہ واری آں پیلو کنگ ءَ انت۔ آئی ءَ گوشت کہ مزن وزیر ءَ کلوہ داتگ کہ اے پی پی ءَ را یک رول مادل ءِ جوڑ کناں۔ آئی ءَ گوشت کہ ادارگ ءَ را سیاس ءَ چہ پاک کنگ یک ٹوھیں چیلنج انت۔ ادارگ آنی توک ءَ نندوکیں مردم میرٹ ءِ مٹ ءَ سپارش ءِ سر ءَ کاینت گڈا آ ادارگ ءِ شرپ، پجار ءُُ کرد ءَ را ڈگار ءَ جن اَنت۔ آئی ءَ گوشت کہ اے پی ءِ ورکرز آنی ھاٹیگ ءِ وسیلگ ءَ چہ ایشرا گہتر ءُُ الکاپیں ادارگ ءِ جوڑ کنگی انت، دگنیا ءِ توامیں نیوز ایجنسیز آنی گوما دیم پہ دیمی کنگ ءِ واستہ ایشرا ھما پڑ ءَ برگی انت تانکہ میاں اوستمانی نیوز ایجنسیز اے پی پی ءِ ھال ءَ را دگنیا ءِ دیم ءَ ایر بکن آں چیا کہ اے پی پی حکومت ءُُ پاکستان ءِ جارچین انت۔ آئی ءَ گوشت کہ اے پی پی ءَ یونین ءُُ انتظامی ءِ نیام ءَ کشاں چیل انت ایشرا ھلاس کنگ ءَ وتی کرد ءَ پیلو کنان ءَ یونین ءِ توامیں جائز یں لوٹ آں پیلو کنگ بوتگ۔ آئی ءَ گوشت کہ کجام ھم جنز ءِ سروک ارزشتی ایں کرد پیلو کنت۔ عمران خان کہ ھمک جاہ ءِ لگت مالیں گریب ءِ نماھندگی ءِ وڑیں درور نہ رس ایت، گوستگیں 70سال ءَ چینکیاس مزن وزیر اتکگ ءُُ شتگ بلے عمران خان ءِ وڑیں مزن وزیر روایتی مزن وزیر سیاستدان جوڑ بوھگ ءِ مٹ ءَ السی سروک بوھان ءَ دراج بُریں پالیشی آنی سر ءَ کار کنگ ءَ انت۔ آ ئی ءَ گوشت کہ استیں حکومت ھم ڈالر ءِ جیڈھ ءِ سر ءَ اسحااق ڈار ءِ وڑیں وت جوڑ کتگیں پالیشی وتی کت کتگ ات بلے حکومت ءَ اے رنگ نہ کت بلکیں جیڈھ آناں سرجمی ءَ گیوار کنگ ءَ ترجی دات۔ آئی ءَ گوشت کہ حکومت میڈیا ءَ بندوکیں جیڈھ ءُُ مشکلہ آں چہ شر سر پد انت، میڈیا ورکرز آنی نہ وشی ھمک نیمگ ءَ گندگ بوھگ ءَ انت ھمے گپ ءِ رد ءَ پیسلہ کنگ بوتگ کہ میڈیا ورکرذ آناں جان سلامتی کارڈ ءِ بھر کنگ بیت، مزن وزیر ہاؤسنگ سکیم ءَ میڈیا ورکرز آناں بھر جوڑ کنگ بوھگ ءَ انت۔ توامیں پریس کلبز ءُُ ادارگ آں گوں بندوکیں میڈیا ورکرز آنی لڑ لوٹ کنگ بوھگ ءَ انت، میڈیا ورکرز آنی گہبودی ءِ واستہ ھمک جاہ شور ءُُ مشور کنگ ءَ آں، پریس کلبز، اے پی این ایس ءُُ سی پی این ای مئے شریکدار بنت، اے پی پی یونین ءِ وسیلگ ءَ میڈیا ورکرز آنی سیت آناں رکھینگ بیت۔ آئی ءَ گوشت کہ ورکرز آنی لوٹ آنی منگ ءِ واستہ ایم ڈی اے پی پی ءَ را زمہ واری داتگ، توامیں ورکر آنی گہتری ءِ واھشت ایگ آں۔ آئی ءَ گوشت کہ وتی سیاست ءَ را السی گہبودی ءِ بنجاھ جوڑ کنان ءَ ملک ءِ دیمروئی ءُُ وشھالی ءِ واستہ وتی کرد ءَ پیلو بکن اَنت، حکومت شمے جوزگ ءَ را ھمک جاھ ءَ رکھین ایت۔ آئی ءَ گوشت کہ الس ءِ ازمت ءِ جوزگ بے مٹ انت، باز کسی سیت، ادارگ آناں برجا ءُُ رول ماڈل جوٹ کنگ ورکرز آنی زمہ واری انت، آئی ءَ گوشت کہ کشاں چیل اچ جیڈھ ءِ گیواری نہ انت، جیڈھ شور ءُُ سلاھ ءِ سر ءَ گیوار بنت، اپوزیشن ءَ را ھم کلوہ انت کہ آ ھم میڈیا ءِ وسیلگ ءَ دروگ مہ بُر اَنت، اپوزیشن ءِ گوما ھور نندگ دراج بریں ایجنڈا آنی سر ءَ کار کنگ لوٹ آں، اپوزیشن گل وتی جوانیں کرد ءَ پیلو بکن اَنت ءُُ یکجا بہ نند اَنت ءُُ کار بکن اَنت، لوٹاں کہ حکومت ءُُ اپوزیشن یکجائی ءَ کار بکن اَنت۔ آئی ءَ گوشت کہ توامیں شوبگ آنی تہ ءَ شوبگ ءَ زالبول آناں ھمکچیں ھک دیگ مئے زمہ واری انت، زالبول آناں دیم ءَ جنزگ ءِ موہ دیان ءَ آوانی ازم ءَ چہ گیش سیت زورگ بوت کنت، زالبول اقتصادی شریکداری اَنت۔ آوانی کرد ارزشتی انت۔ ایشی ءَ پد مزن وزیر ءِ ھاسیں کماکر برائے اھوالکاری ءُُ شنگ کاری ڈاکٹر فردوس عاشق اعوان ءِ سروکی ءَ اے پی پی ءِ کانفرنس روم ءَ دیوان ءِ برجم دارگ بوت ایشی ءِ تہ ءَ سیکرٹری اھوالکاری شفقت جلیل، ایم ڈی اے پی پی طارق محمود خان، اے پی پی یونین ءِ باسک شریک بوت اَنت۔ ڈاکٹر فردوس عاشق اعوان ءَ نندوکیں مردم آناں سرپد کت کہ اے پی پی ءَ نوکیں ایم ڈی ءِ آرگ بوتگ ءُُُ ایشرا ھاسیں ٹاسک دیگ بوتگ کہ آ یونین ءِ گوما یکجا بہ نند ایت ءُُ جیڈھ آناں گیوار بکنت، اے پی پی ملازم آنی سی پی فنڈ ءَ را واپس زورگ بوتگ، 10درسد ایڈہاک الاؤنس 30جون ءَ تاں پگار آنی تہ ءَ ھوار کنگ بیت، نوکیں ایم ڈی ءَ را اے ھم پنت ءُُ شون دیگ بوتگ کہ اے پی پی ملازم آنی ترقی ءِ واستہ ڈی پی سی یک ماھے ءِ توک ءَ گوانک بجن ات ءُُ میرٹ ءِ سر ءَ ملازم آناں ترقی بدیت۔ آئی ءَ گوشت کہ اے پی پی ملازم آنی گوستگیں سال آنی بقایاجات آنی دیگ ءِ واستہ ا لکوکیں گرانٹ ءِ واستہ سمری مزن وزیر ءَ را روان دیگ بیت، مئے کوشست بیلت کہ اے پی پی ملازم آناں کسانیں ائید ءَ چہ پیسر وشیں ھال ءِ پجارینگ بیت۔ آئی ءَ گوشت کہ اے پی پی ءِ کنٹریکٹ ملازم آناں پکو کنگ ءِ واستہ سمری روان دیگ بیت ایشی یے تہ ءِ استیں پینگ دور کنگ بنت۔ مزن وزیر ءِ ھاسیں کمکار ڈاکٹر فردوس عاشق اعوان ءَ گوشت کہ اے پی پی ملازم آنی فنانشل ءُُ سروس رولز آنی مسل شور ءُُ سلاھ ءَ گوں جوڑ کنگ بنت تانکہ توامیں سٹیک ہولڈرز آناں قبول بہ بیت۔ آئی ءَ اے پی پی وی این ایس سروس ءَ را برجا کنگ ءَ ھوار انتظامی ءَ را ڈیجٹلائزیشن ءِ واستہ گامگیج آناں ترند کنگ ءِ بابت ءَ پنت ءُُ شون کت۔ آئی ءَ ایم ڈی اے پی پی ءَ را پنت ءُُ شون کت کہ اے پی پی ایمپلائز یونین ءِ کارندہ آنی ھلاپ ءَ مالی یا کزبی کرد ءَ ابید توامیں انکوائری آناں واپس زورگ بہ بیت۔
