اسلام آباد۔ 15مئی (اے پی پی) صدر مملکت ڈاکٹر عارف علوی پارینے کہ حکومت کاروباری برادری ءِ مون تروک ویل آتیان معلومدار ءِ و ملک اٹی کاروبار دوست چاگڑد ءِ مون آ دننگ کن ہروڑنا گام گیج کننگ ءِ۔ ملک انا اقتصادی شونداری ٹی نجی بشخ انا کڑد ستاکڑزک۔ اوداہیت ءِ پاکستان ٹیکسٹائل ایکسپورٹرز ایسوسی ایشن نا چیئرمین خرم مختار تون گپ و تران کرسا پارے ہرا چارشنبے نا دے آ ایوان صدر اٹی اوڑتون اوڑدہی کرے۔ صدر مملکت دا ہیت ءِ تالان کرے کہ ملک انا سخت اقتصادی حالیت آک مشکل فیصلہ غاتا متقاضی ءُ ولے حکومت معیشت ءِ گچین کننگ کن پرعزم ءِ۔ اوپارے کہ بے المی و پرتعیش گڑاتا درآمد ءِ کم کرسا واپاری نسخان اٹی کمتی اتنگ حکومت نا حکمت عملی نا اہم ءُ جزو اسے۔ اوپارے کہ حکومت کاروبار نا خڑچ اٹی کمتی کن کوشست کننگ ءِ و او ٹیکسٹائل، چمڑہ، قالین، ازباب جراحی و گوازی تا گڑاکون آ پنچ اہم برآمدی بشخ آتے کن خراج زیرو ریٹنگ نظام اس درستی راستی کرفینے۔ اوپارے کہ ٹیکسٹائل نا بشخ اٹی پٹ و پول و شونداری آ زرکاری و انسانی وسیلہ غاتا مون آ دننگ معاشی بحالی کن المی ءِ ہراٹی پاکستان ءِ مسابقانہ برتری دوئی ءِ۔ صدر داہیت آ زور شاغا کہ کاروباری بندغ آتے تینا خراج آتا ادائیگی نا است بڈی ءِ کننگ اٹ تینا فعال کڑد ءِ بایدے ادا کیرتانکہ بجٹ نسخان ءِ کم کننگ مرے و شونداری کاریم تے کن زیات فنڈ جتا مرے۔ اودا ہیت انا اعادہ ءِ کرے کہ دوئی مروک آ فائدہ غاتے تقویت تننگ و شرح نمو نا وارخواہی پٹنگ کن غٹ اقتصادی بشخ آتا ہمگرنچی ءِ بایدے المی جوڑ کننگے۔
