اسلام آباد۔ 14مئی (اے پی پی) بنجائی وزیر مواصلات مراد سعید پارینے کہ وزیراعظم عمران خان نا سرکڑدہ ہی ٹی ملکی ادارہ غاک گچین مننگ ءُ، پاکستان پوسٹ انا گدرینگوک آ سال داوخت اسکان ریونیو ہشت ارب روپئی ئس ہرا اینخو نا سال اپریل اسکان 14 ارب روپئی مسنے۔ سے شنبے نادے آ تینا بیان اٹی بنجائی وزیر پارے کہ انشاء اللہ عمران خان نا سرکڑدہ ہی ٹی غٹ ادارہ غاتے نسخان آن کشسا کٹیا کروک جوڑ کینہ۔ مراد سعید پارے کہ پاکستان پوسٹ زوت لاجیسٹک سیکٹر اٹ انقلاب اس اتیک۔ ای کامرس نا بناآن پد 46000 پارسل سی او ڈی آن سرکننگا۔ پاکستان پوسٹ نا بزنس نا ودنگ آن ریلوے آن پین بوگی ہم خواہسن۔ گڑاتا زیات مننگ نا سوب آن پین بوگی درکار ءِ تانکہ پارسل نا وخت آ ترسیل مرے۔ پاکستان پوسٹ زوت مچ آ دنیا ٹی میڈ ان پاکستان پراڈکٹس نا پروجیکٹ نا ہم بناءِ کیک۔ پاکستان پوسٹ ملک انا اہم ادارہ گچین نا کنڈا روان خنسا است ءِ خوشی ملک۔ بنجائی وزیر پارے کہ ادارہ نسخان اٹی مرے تو الس نا جان جوڑی تعلیم دیر انا پیسہ غاک دا نسخان ءِ پورو کننگ آ لگرہ۔ انشاء اللہ عمران خان نا سرکڑدہ ہی ٹی غٹ ادارہ غاتے گچین کینہ۔
