غٹ سیاسی جماعت آتا امنائی اٹ مسکوہی فاٹا نا نشست آتا کچ اٹی ودکی نا فیصلہ ستاکڑزک، داڑان مسکوہی فاٹا نا السءِ دا احساس مریک کہ اوفتا ویل آتے ایسر کننگ انگ ءِ
اسلام آباد۔ 13مئی (اے پی پی) وزیراعظم عمران خان پارینے کہ ملک انا صوبہ اس مرے یا بشخ اس، کم شون ہلوک علاقہ غاتے شونداری نا دنگ اٹ اوار کننگ آن احساس محرومی مرمریک، غٹ سیاسی جماعت آتا امنائی اٹ مسکوہی فاٹا نا نشست آتا کچ اٹی ودکی نا فیصلہ ستاکڑزک، داڑان مسکوہی فاٹا نا السءِ دا احساس مریک کہ اوفتا ویل آتے ایسر کننگ انگ ءِ، قومی مالیاتی کمیشن اٹی فاٹا ءِ 3 درسد ودکی بشخ تننگ آ ہر حال اٹ عملدرآمد کننگے۔ دوشنبے نادے آ قومی اسمبلی ٹی صوبہ خیبر پختونخوا ٹی اوار مروک آ قبائلی ضلع غاتے ٹی قومی و صوبائی اسمبلی نا نشست آتا اول سرآن تعین کن دستور (ترمیمی)بل 2019ء آ شرہ ءِ چٹفسا وزیراعظم عمران خان پارے کہ اینو کنے بھاز خوشی مسنے کہ فاٹا نا بابت دا اہم آئینی ترمیم نا مچ آ ایوان مخ تفی ءِ کننگ ءِ، داڑان قبائلی علاقہ غاتا خلقت ءِ دا احساس مریک کہ قوم اوفتے تون سلوک ءِ، وزیراعظم پارے کہ دہشت گردی نا برخلاف جنگ اٹی قبائلی علاقہ غاتے ٹی ہراوڑ تباہی مسنے و داڑان ہراوڑنا ویل آک مون آ بسنو قوم خواہک کہ دا ویل آک ایسر مریر و دا خلقت نا توار ءِ بِننگے۔ کنے بھاز بے حد خوشی مسنے کہ غٹ سیاسی جماعت آک امنائی اٹ مسکوہی فاٹا نا نشست آتا کچ اٹی ودکی نا فیصلہ ءِ کرینو۔ وزیراعظم پارے کہ او غٹ صوبہ غاتے دا پاننگ خواہک کہ قومی مالیاتی کمیشن اٹی فاٹا ءِ 3 درسد ودکی بشخ تننگ آ ہرحال اٹ عملدرآمد کننگے۔ کنے معلوم ءِ کہ معاشی مشکل آتا سوب آن صوبہ غاتے گڑاس گڑتی ارے ولے ای سمجھیوہ ککہ فاٹا ٹی ہرا بھس کاری مسنے دا بھس کاری نا ازالہ ءِ خیبر پختونخوا نا صوبہ تینا فنڈ آن کننگ کپک۔ داٹیایلو صوبہ غاک ہم بایدے تینا کڑد ءِ ادا کیر تانکہ ہموڑے بنداوی پنجر و ایلو ویل آتا ایسری کن عملی گام گیج کننگ مرے۔ وزیراعظم پارے کہ دے ٹکی پاکستان نا سانحہ اسہ بھلو واقعہ اسے ہرانا بنداوی سوب احساس محرومی ئس، دا احساس محرومی داخاطران ئس انتئے کہ دے ٹکی پاکستان ءِ ہرانمائندگی ملوئی ئس اواودے ملیتو۔ دے ٹکی پاکستان نا سانحہ غان ننے سبخ اس ہلنگ نا گرج ءِ و او سبخ دادے کہ ملک انا ہراکہ علاقہ مرے اونا خلقت ءِ دا محسوس کننگ نا توبت اتنگپ کہ او دا سمجھر کہ پاکستان اوفتے قبول کپننگ ءِ یا اوفتا توار ءِ بِننگ انگ اٹی اف۔ دا اسہ خطرناک ءُ رجحان اس مریک و ملک دشمن قوت آک ہندا نا بنداو آ ملک ءِ نسخان ایترہ۔ وزیراعظم عمران خان پارے کہ پاکستان نا غٹ علاقہ غاتا اسہ وڑ شونداری آ چکار کننگ نا گرج ءِ۔ ننے دا کوشست کروئی مریک کہ کم شون ہلوک علاقہ غاتا ویل آتے ہم اولیتی بنداو تیا ایسر کننگے۔ وزیراعظم دے ٹکی و دیکی جرمنی نا حوالہ ءِ ترسا پارے سیوت آن پد دے ٹکی جرمنی نا بشخ پسماندہ سلیسوسس ہنداٹی دیکی جرمنی قربانی ترسا تینا دے ٹکی بشخ ءِ شون ہلو ک کرے۔ ہندا جوزہ نا رداٹ ننے تینا ویل آتے ایسر کروئی ءِ۔ اوپارے کہ اینو خوشی نا دے ءِ، مسکوہی فاٹا نا الس ءِ دا احساس مریک کہ پاکستان ءِ اوفتا احساس ءِ و اوفتا ویل آتے ایسر کننگ انگ ءِ۔
