اسلام آباد۔ 13مئی (اے پی پی) وزیر خارجہ شاہ محمود قریشی پارینے کہ پاکستان نا دشمن واک آتے شکست فاش مریک، پاک چین اقتصادی راہداری آ مچ آ قوم امنا ءُ، گوادر اٹی دہشت گرد آتا مقابلہ ءِ کرسا جان ءِ ندر کروک آ محافظ و پاکستان نا سلہہ بند فوج ءِ خراج تحسین پیش کینہ ہرافک دہشت گرد آتے اوفتے اوفتا کروک نا سزا تسر۔ دوشنبے نادے آ قومی اسمبلی ٹی احسن اقبال و راجہ پرویز اشرف نا کنڈآن چست کروک ٹک آتا ورندی ءِ ترسا وزیر خارجہ شاہ محمود قریشی پارے کہ گوادر و سی پیک نا اہمیت آن ہچ گہس انکار کننگ کپک، مچ آ قوم سی پیک آ امنا ءُ، و قوم سمجھک کہ دا ڈٹ ءِ ایسر اسکان سرکننگ آن علاقائی رابطہ غاتے ٹی ودکی مریک و پوسکن ءُ کسر ملنگک۔ داڑان توانائی نا ہرا کوریڈور مریک اوڑان مچ آ ڈیہہ نا شونداری مریک۔ سی پیک و راہداری آ پاکستان و دا ایوان امنا ءُ۔ اوپارے کہ پاکستان ہراوڑ نیو کلیئر پروگرام ءِ مون آ دننگ کن غٹ اڑاند آتا مقابلہ ءِ کرے ہمووڑ گوادر ءِ سرسہب کننگ و ملک ءِ اقتصادی وڑاٹ مون آ دننگ نا ہدف اٹ غٹ اڑاند آتے عبور کیک۔ اوپارے کہ گوادر اٹی دہشت گرد آتون مقابلہ ٹی جان ءِ ندر کروک آ محافظ و پاکستان نا سلہہ بند فوج ءِ خراج تحسین پیش کیوہ ہرافک دہشت گرد آتے اوفتے اوفتا کروک نا سزا تسر۔ اوپارے کہ مچ آ قوم ءِ اواری اٹ دا واک آتے شکست تروئی ءِ، ننا سد اختلاف آک مریر ولے قوم و پارلیمان ملکی فائدہ غاتیا سودہ بازی کپک۔ اوپارے کہ نن تینا سیکورٹی چیلنج آتیان معلومدار ئسن ہنداخاطران سی پیک نا بابت خصوصی ڈویژن نا قیام ءِ عمل اٹ اتنگاسس، انشاء اللہ دشمن ءِ شکست مریک و پاکستان معاشی شون ہلیک۔ اوپارے کہ سویلی پنجاب آ بل اس پیش مسنے، دا تحریک انصاف نا آئینی وعدہ ءِ و پی پی پی ہم ذہنی وڑاٹ متفق ءِ ببو اواری اٹ دانا ایسر اس کشن۔ داکان مست مسکوہی وزیراعظم راجہ پرویز اشرف پارے کہ آئینی ترمیم کننگ نا وخت آ رولز ءِ گوجالنگ مفک، سویلی پنجاب نا بابت ہرا بل پیش مس او مست آن سینیٹ اٹی ءِ۔ اسہ ایلو آ سبقت دننگ آن پاناد کننگے۔ بلوچستان اٹی بھلو سانحہ اس مسنے۔ وزیر داخلہ و وزیراعظم پالیسی بیان اس بایدے تروسر۔ بلوچستان اٹی داخہ بھلو واقعہ اس مسنے دانا جا چءِ ہلنگ المی ئس۔ اوپارے کہ کارروائی ءِ بایدے رول انا رداٹ چلیفنگے۔
