اسپیکر قومی اسمبلی اسد قیصر نا کماشی ٹی حکومتی و اپوزیشن راہشون تا پارلیمنٹ ہاؤس اٹی دیوان اس

اسلام آباد۔ 13مئی (اے پی پی) اسپیکر قومی اسمبلی اسد قیصر پارینے کہ قومی اسمبلی نا ساڑی آ دیوان 24مئی اسکان برجاتخنگ نا فیصلہ ءِ کننگانے، ایوان نا چاگڑدءِ پرامن و خوشگوار تخنگ حکومت و اپوزیشن نا اسیجا زمواری ءِ۔ دوشنبے نادے آ اسپیکر قومی اسمبلی اسد قیصر نا کماشی ٹی حکومتی و اپوزیشن راہشون تا پارلیمنٹ ہاؤس اٹی دیوان اس مس۔ دیوان اٹی وزیر دفاع پرویز خٹک، وزیر خارجہ شاہ محمود قریشی، وزیر مذہبی امور نورالحق قادری، ڈپٹی اسپیکر قاسم خان سوری، باسک قومی اسمبلی سید خورشید شاہ، راجہ پرویز اشرف، سید نوید قمر، خواجہ محمد آصف، رانا تنویر حسین، احسن اقبال و محسن داوڑ تون اوار ایلو باسک آک بشخ ہلکر۔ دیوان اٹی فیصلہ کننگاکہ قومی اسمبلی نا ساڑی دیوان ءِ 24مئی اسکان برجاتخنگک۔ اسپیکر اسد قیصر پارے کہ ایوان نا چاگڑد ءِ پرامن و خوشگوار تخنگ حکومت و اپوزیشن نا اسیجا زمواری ءِ۔ گچین کانود سازی نا کمک اٹ السی ویل آتے ایسر و ایوان نا وقار ءِ بلند کننگ مریک، ملکی ویل آتا ایسری کن ایوان اٹی نمائندگی تخوک آ جماعت آتے ٹی امنائی المی ءِ۔ اسپیکر پارے کہ داوخت آ ملک ءِ ہرا ویل آتا مون تروک ءِ اوفتا مون ءِ توننگ کن غٹ سیاسی واک آتے کڑد اداکروئی مریک۔ پارلیمنٹ نا سوگوی جمہوریت نا سوگوی و استحکام کن المی ءِ۔ اوپارے کہ ایوان نا چاگڑد ءِ خوشگوار تخنگ کن ننے اسہ ایلو نا رائے نا شرف ءِ کروئی مریک۔ اسپیکر اسد قیصر دیوان اٹی بشخ ہلوک آتا کانود سازی نا عمل و ایوان نا کارروائی ءِ سازگار تخنگ اٹ ہروڑ کمکارینا باوری کرفے۔