اسلام آباد۔ 13مئی (اے پی پی) بنجائی وزیر سیفران شہریار آفریدی پارینے کہ حکومت ملکی معیشت نا گچینی کن سنگت ملک آتیان 15بلین ڈالر ایس، ہراتم حکومت ملا تو زرمبادلہ نا کوڑیک 15 دے انائسر، جہانی مالیاتی ادارہ غان بیدس پاکستان تون پین ہچ ءُ آپشن اس الوکہ، ہچ گہس کانود آن ایڑتر اف، ملک ءِ پلوک آتیان ضرور حساب الینہ۔ دوشنبے نادے آ پارلیمنٹ ہاؤس نا پیشن میڈیا تون گپ و تران کرسا اوپارے کہ پاکستان ءِ وام ہلنگ کن جہانی مالیاتی ادارہ غان بیدس پین ہچ ءُ آپشن اس الوکہ، گچین شڑت آتون جہانی مالیاتی ادارہ تون ڈیل مسنے ہراڑان اسہ سال اٹی ملک آن کبینی چٹک۔ اوپارے کہ وزیراعظم تینٹ آئی ایم ایف نا ٹیم اتون مذاکرات نا چاروکی ءِ کرسا کرے۔ اوپارے کہ 71سال انا گند ءِ اسہ نن اٹ چٹفنگ مفک۔ داڑکن وخت درکار ءِ۔ وزیر مملکت پارے کہ ہراتم حکومت ملا تو 15دے انا زرمبادلہ نا کوڑیک ئسر ہرانا سوب آن سنگت ملک آتیان 15 ارب ڈالر ملکی معیشت نا گچینی کن دوئی کننگا ہرا جوان ءُ گام اسے۔ شہریار آفریدی پارے کہ آئی ایم ایف آ ہِننگ جوان الوکہ ولے ننتون پین ہچ ءُ آپشن اس الوکہ۔ اسہ سال اٹی ملکی معیشتءِ ٹریک آ اتینہ۔ اسہ سوج اسے نا ورندی ٹی اوپارے کہ اسٹ اس ہم کانود آن ایڑتر اف۔ ہموفتیا ضرور احساب ہلنگک ہرافک قومی دولت ءِ بے دردی اٹ لٹار، پاکستان ویزہ پالیسی ءِ نرم کرینے ہراڑان سرمایہ دار زرکاری کن پاکستان ءِ پلو ءِ ہلنگ ءُ ہراڑان ملکی معیشت سوگو مریک۔ اوپارے کہ حکومت سیل وسوات ءِ مون آ دننگ کن گام گیج چست کننگ ءِ۔
