ملتان۔ 12مئی (اے پی پی) وزیر خارجہ مخدوم شاہ محمود قریشی نا کماشی ٹی سرکٹ ہاؤس اٹی بڑزکو کہول انا دیوان اس اڈ ہلک۔ ہراٹی چندی محکمہ غاتا کارکڑد و شونداری ڈٹ آتیا پیش رفت نا جاچ ءِ ہلنگا۔ چیف وہپ ملک عامر ڈوگر، پارلیمانی سیکرٹری زین قریشی تون اوار قومی و صوبائی اسمبلی نا باسک آک ہم دیوان اٹی ساڑی ئسر۔ ڈپٹی کمشنر عامر خٹک ویسٹ مینجمنٹ کمپنی، واسا و شونداری ڈٹ آتیا سرجم حوال تس۔ داوخت آ تران کرسا وزیر خارجہ شاہ محمود قریشی پارے کہ مسکوہی دور اٹی السی است خواہی تا رداٹ ملتان اٹی شونداری کاریم متنے ہرا است ہسونی اسے۔ مستین اٹی دا ڈیہہ نا فنڈ ءِ لاہور آ مون تننگا ہراڑان داڑے احساس محرومی ٹی ودکی مس۔ وزیر خارجہ مستی پارے کہ نن حکومت پنجاب آن ملتان اٹی انفراسٹرکچر نا گچینی کن خصوصی فنڈ انا خواست ءِ کینہ۔ اوپارے کہ مستین آنبار ملتان تون بے حق آ لمہ غانبار کون آ سلوک مننگ کن الیپنہ۔ ویسٹ مینجمنٹ کمپنی ٹی 3 نیم ارب نا کرپشن نا جاست وپاست پبلک اکاؤنٹس کمیٹی آن کرفنگک۔او پرمان کرے کہ ویسٹ مینجمنٹ کمپنی نا انتظامیہ سینٹری ورکرز و مشینری نا کمتی ءِ دمدستی پورو کرسا شار ءِ ساف کے۔ وزیر خارجہ پارے کہ کمپنی ٹی 3نیم ارب نا کرپشن اٹی مسکوہی سیاسی سرکڑدہ غاک ہم اوار ئسر۔ ساڑی حکومت میرٹ و شفافیت نا پالیسی آ عمل کننگ ءِ۔ او سیوریج نا نظام ءِ اپ گریڈ کننگ نا ہم پرمان کرے۔ وزیر خارجہ مستی پارے کہ 35 درسد شار اٹی سیوریج نظام نا مفننگ است ہسونی اسے۔ صوبائی باسک آک ملتان نا سیوریج ویل آتے کن اسمبلی ٹی ہیت کیر۔ اوپارے کہ گدرینگوک آ 5سال اٹی بیرہ 1.4 کلومیٹر سیوریج شاغنگا ہرا مسکوہی حکمران تا نابودی نا شاہدی اسے۔ اوپارت کرے کہ اسہ ارب 25کروڑ نا واسا نادہندگان آتا برخلاف کریک ڈاؤن کننگے۔ وزیر خارجہ پارے کہ غٹ سیاسی سرکڑدہ غاک شار انا شونداری کن ضلعی انتظامیہ تون ہم کوپہ سلوک ءُ۔
