اسلام آباد۔ 12مئی (اے پی پی) پاکستان و ترکی نا نیام اٹ آزادانہ واپار نا معاہدہ (ایف ٹی اے) آ جون اٹی دستخط نا گمان ءِ۔ وزارت واپار نا کمامدارآک ”اے پی پی“ تون گپ و تران کرسا پاریر کہ دا ہیت انا فیصلہ ءِ ہڑتوم آ ملک آتا مذاکرات نا نہہ می دور انا ایسر آ کننگک۔ اوفک پاریر کہ تدوک آ دیوان اٹی کڑدہ غاک ٹیرف لین نا گڈیکو فہرست آ امنا کریسر و ترکی ہم ٹیکسٹائل نا پاکستان برآمد کنندگان ءِ تینا منڈی تسکان ڈیوٹی فری رسینگ آ امنا ءِ۔ اوفک پاریر کہ پاکستان و ترکی نا مذاکرات جونک اٹی ہم برجاسلک تانکہ حتمی معاہدہ کرسا ہڑتوم آ کنڈآتا واپار ءِ مون آ دننگ مرے۔ کمامدارآک پاریر کہ پاکستان ترکی تون ایف ٹی اے ءِ پاک ترک تزویراتی اقتصادی فریم ورک انا رداٹ گڈیکو دروشم اس ایتک۔ اوفک پاریر کہ تین پہ تینی کمکاری نا بابت ٹیکسٹائل، سیل وسوات، دودوربیدگ، زرکاری، صنعتی کمکاری، آٹو انڈسٹری، کشت وکشار، بینکاری و مالیات نا بشخ آتیا خصوصی چکار کننگک۔ اوفک پاریر کہ ایف ٹی اے آن پاک ترک ہڑتوم آ کنڈآتا واپار اٹی نمان ودکی مریک۔
