چیئرمین سینیٹ محمد صادق سنجرانی نا لمہ غاتا جہانی دے انا وخت آ خصوصی ءُ کلہو اس

اسلام آباد۔ 12مئی (اے پی پی) چیئرمین سینیٹ محمد صادق سنجرا نی پارینے کہ لمہ ڈکھ و مصیبت آتا مون اٹ تینے ترسا چناتے سکھ تروک آ قدرت نا انمول ءُ ٹیکی اسے، لمہ ہمو ہستی ءِ ہرادے جوڑ کروک آ اونا نت تا کیرغ آن جنت ءِ تخا،بے شک مہر و مابت نا خاص انگا رنگ لمہ نا مقدس انگا رشتہ تون گنڈوک ءِ۔ یک شنبے نادے آ لمہ غاتا جہانی دے انا وخت آ خصوصی کلہو اٹی چیئرمین پارے کہ اینو مچ آ دنیا ٹی لمہ نا مقدس رشتہ، اونا عظمت و اہمیت ءِ تالان کننگ نا دے ءِ ولے ننا مذہب و راجی قدر انا رداٹ تو ہڑدے ہی لمہ تون گنڈوک ءِ، صادق سنجرانی پارے کہ لمہ ہمو ہستی ءِ ہرا بلاشبہ ہروخت اولاد نا است اٹی ءِ، لمہ ہمو ہستی ءِ ہرادے جوڑکروک آ اونا نت تا کیرغ آن جنت ءِ تخا۔ چیئرمین سینیٹ پارے کہ لمہ ڈکھ و مصیبت آتا مون آ تینے ترسا چناتے سکھ تروک آ قدرت نا انمول ءُ ٹیکی اسے۔ صادق سنجرانی پارے کہ اینو نا دے غٹ تینا لمہ غاتے دا احساس ترفنگ کینہ کہ او اوفتے کن ہمیشہ اہم ئسر و اریر۔ ننے غٹ ءِ نئے بیرہ اینو بلکن ہروخت لمہ غاتے دا باور کرفن کہ نن اوفتے تون مدام مہر و مریبت کرسا کینہ۔ اوپارے کہ دا موقع غا ملک اکن جان نا قربانی ءِ تروک آ بہادر لمہ غاک سلام عقیدت نا حقدار ءُ۔