اسلام آباد۔ 12 مئی (اے پی پی) ڈپٹی اسپیکر قومی اسمبلی قاسم خان سوری گوادر اٹی فائیو اسٹار ہوٹل آ مروک آ دہشت گرد آتا جلہو نا ترند انگا لوز آتے ٹی مذمت ءِ کرینے۔ یک شنبے نادے آ تینا اسہ بیان اسے ٹی او جلہو اٹی شہید مروک آ سیکورٹی گارڈ انا دلیری آ خراج تحسین و خاہوت تون دلی ہمدردی نا درشانی ءِ کرے۔ اوپارے کہ سیکورٹی فورس آتا وخت آ کارروائی مہمان تے بحفاظت پیشن آ کشنگ اٹ اہم ءُ کڑد اس ادا کریر، گوادر صوبہ بلوچستان تون اوار مچ آ ملک انا شونداری نا ہند تکنگک ہرا ملک دشمن آتے کیدنگ مفننگ ءِ۔ ڈپٹی اسپیکر قومی اسمبلی پارے کہ دہشت گرد آک تینا گندہ انگا مسخت آتے کن داڈول نا لغوری نا کارروائی کرسا ملکی امن ءِ لتاڑنگ خوارہ ہراٹی او سرسہب مفسہ۔ قاسم خان سوری پارے کہ بلوچستان ملکی شونداری نا ہند تکنگک کانود نافذ کروک آ ادارہ غاتے بلوچستان اٹی امن کن اولیتی بنداو تیا گام گیج چست کننگ نا گرج ءِ۔ دہشت گردی نا برخلاف جنگ اٹی بلوچستان غٹ آن زیات زہمی مسنے۔ بلوچستان نا الس دلیر و نڈر ءُ، دہشت گردی نا برخلاف اوفتا قربانیک ناقابل فراموش ءُ۔ ڈپٹی اسپیکر شہید سیکورٹی گارڈ انا درجہ غاتا بڑزی کن دعا ہم کرے۔
