زرکاری بورڈ سی پیک نا رداٹ ہفت خاص انگا اقتصادی زون تا ترند جوڑ کننگ کن حکمت عملی اس جوڑ کرے

اسلام آباد۔ 12مئی (اے پی پی) زرکاری بورڈ بروک آ اِرا سال اٹی سی پیک نا رداٹ جوڑ کروک آ ہفت خاص انگا اقتصادی زون تا ترند ترین جوڑ کننگ کن جامع حکمت عملی اس جوڑ کرینے۔ چین پاکستان اقتصادی راہداری ڈٹ(سی پیک) نا سیکرٹریٹ نا وڑاٹ زرکاری بورڈ 9 مخصوص اقتصادی زون تا پیدواری ءِ کریسس ولے 7 زون تا نوٹیفکیشن ءِ جاری کننگانے۔ زرکاری بورڈ انا چیئرمین ہارون شریف پارے کہ دا اقتصادی زون تیٹی ڈغار نا دوئی کننگ، یوٹیلیٹی سروسز، سیکورٹی و بنداوی پنجر نا ویل آتا چٹفنگ کن ہلہلئی گام گیج کننگک تانکہ تخوک آ وخت اٹ دافتا پوروی ءِ المی جوڑ کننگ مرے۔ اوپارے کہ مسلم لیگ (ن) نا مسکوہی حکومت خصوصی زون تا جوڑ کننگ نا بابت ویل آتا چٹفنگ آ ہچ ءُ چکار اس کتویسس ہراڑان اوفتا جوڑ کننگ اٹ ہرے مس۔ اومستی پارے کہ اول راشکئی، ایم ون نوشہراہ و چائنہ اسپیشل اکنامک زون دھابیجی نا مسہ زون آتیا خصوصی چکار کننگک اوکان پد ایم تھری علامہ اقبال انڈسٹریل سٹی و فیصل آباد زون آتیا ارٹ میکو مرحلہ ٹی خصوصی گام گیج کننگک۔ اوپارے کہ خاص انگا اقتصادی زون تا جوڑ کننگ آن ملک اٹی ہندی و درملکی زرکاری ءِ مون آ دننگ اٹ صنعتی و واپاری سرجزآتے ٹی ہم ودکی مریک و روزگار نا پوسکن ءُ وارخواہی ودی مریک۔