اسلام آباد۔ 12مئی (اے پی پی) یوٹیلیٹی اسٹور آتیا روچہ نا مبارک انگا تُو اٹی 19 گڑاتیا خصوصی سبسڈی تننگانے وخت اس کہ نوک انا نن اسکان 15سد آن زیات گڑاتیا خصوصی رعایت تننگانے۔ یوٹیلیٹی اسٹورز کارپوریشن کمامدارآتارداٹ بنجائی حکومت 4مئی آن یوٹیلیٹی اسٹور آتا کمک اٹ الس کن 2 ارب نا سبسڈی نا پڑو ءِ کریسس ہراٹی دا اسٹور آتیا روچہ ٹی 19 گڑاتیا خصوصی سبسڈی تننگانے۔ داگڑاتیٹی بورہ، نت، دال، برنج، سی و تیل، چاہ، بیسن، پیہن انگا دال، ٹیٹرا پیک پال، اِلار، شربت و مصالہ غاک اوارو، داکان بیدس یوٹیلیٹی اسٹور آتیا دوئی 1500 آن زیات گڑاتیا ہم خصوصی رعایت تننگانے، ہرانوک انا نن اسکان برجاسلک۔ ترجمان یوٹیلیٹی اسٹورز کارپوریشن نا رداٹ یوٹیلیٹی اسٹور آتے دا شرف دوئی ءِ کہ مچ آ ملک انا 15 کروڑ آن زیات کسٹمر مچ آ سال تینا ہردے ئی کنوئی آ گڑاتا ہلنگ کن یوٹیلیٹی سٹورآتیا بریرہ ہراکان اوفتے نئے بیرہ اڑزان بلکن آب اٹ گڑاک آسانی اٹ ملرہ۔ روچہ نا مبارک انگا تُو اٹی حکومت پاکستان نا ریلیف پیکج نا سوب آن ہر پاکستانی یوٹیلیٹی اسٹور آتیان گڑا ہلیک ہرانا سوب آن اسٹور آتیان گڑاتا چٹنگ ہڑدے نا ہیت اسے، ہرافتے دُوارہ پُر کننگک۔ اوپارے کہ مچ آ ملک انا یوٹیلیٹی اسٹور آتیا ہچ ءُ وڑاسے نا ہچ ءُ کاختی اس اف و اگہ جاگہ سے آ کمتی مس تو ہموڑے دمدستی وڑاٹ گڑاتے سر کننگک۔ اونا پاننگ ئس کہ روچہ ٹی چھٹی کروک آ دے آ ہم اسٹور آتا ملنگ انگ و ایلو دے تیٹی ہم اسٹور ٹائمنگ اٹی ہم ودکی کننگانے۔ مچ آ ملک اٹی یوٹیلیٹی اسٹور آتا ورکرآک دا پیکج ءِ الس اسکان سرکننگ کن دے و نن خواری کننگ ءُ تانکہ الس اسکان بنجائی حکومت نا سبسڈی ءِ جوان وڑاٹ سرکننگ مرے۔
