وزیراعظم عمران خان نا لاہور اٹی شوکت خانم ہسپتال کن فنڈ ریزنگ دود آن تران

لاہور۔ 11مئی (اے پی پی) وزیراعظم عمران خان پارینے کہ سرکاری ہسپتال آتا آب ءِ پرائیویٹ نا بریبر اتینہ، سرکاری ہسپتال آتے ٹی سزا وجزا نا نظام ءِ اتنگک ہرا ڈاکٹر جوان کاریم کیک اونا است بڈی ءِ کننگک وخت اس کہ کاریم نا دُز آتا احتساب مریک، ہراتم اسکان سرکاری ہسپتال آک سہی مفسہ غریب آتے گچین درمان ملنگ کپک، دا چرجوئی ٹی نن اسہ اڑاند اسے ہم سگپنہ۔ ہفتہ نادے آ لاہور اٹی شوکت خانم ہسپتال کن فنڈ ریزنگ نا دود آن تران کرسا وزیراعظم پارے کہ نن سرکاری ہسپتال آتا آب ءِ پرائیویٹ ہسپتال آتا بریبر اتینہ ولے دانا دامسخت ہرگز اف کہ نن ہسپتال آتا نجکاری ءِ کننگ اُن ننا مسخت داٹی گچینی اتنگ نا ءِ۔ اوپارے کہ شوکت خانم ہسپتال اٹی ہرمریض ڈاکٹر کن وی آئی پی مریک، عملہ غٹ انا اسہ وڑدرمان ءِ کیک و کل ءِ اسہ وڑ ہُننگک۔ شوکت خانم ہسپتال پشاور کینسر نا درمان نا بھلا ہسپتال و ہموڑے پوسکن انگا آسراتیک دوئی ءُ۔ وزیراعظم پارے کہ کراچی ٹی شوکت خانم لاہور آن ہم بھلو ہسپتال اس مننگ ءِ۔ اوپارے کہ زکواۃ نا مچ آ پیسہ غاتے غریب آتا درمان آ خڑچ کننگک ہنداخاطران غٹ مخلوق زکواۃ آتے شوکت خانم ءِ ایتر۔ شوکت خانم اٹی 75آن 80 درسد درمان مفت کننگک۔ اوڈونرز آتا ہم منت واری ءِ ہرفے۔ وزیراعظم پارے کہ شوکت خانم نا دود آتے کن مدام بریوہ۔ اوپارے کہ داکان بیدس نن نمل و القادر یونیورسٹی اس ہم جوڑ کرینن۔ نن تینا ورناتے سائنس و ٹیکنالوجی ناپوسکن ءُ تعلیم فراوان کینہ۔ وزیراعظم شوکت خانم ہسپتال نا ڈاکٹر، نرس و غٹ عملہ نا منت واری ءِ ہرفے و اوفتے خراج تحسین پیش کرے۔