آزاد جموں و کشمیر نا صدر سردار مسعود خان نا زالبول و ورناتا ڈل و میڈیا نا نمائندہ غاتون گپ و تران

مظفر آباد۔ 11مئی (اے پی پی) آزاد جموں و کشمیر نا صدر سردار مسعود خان پارینے کہ ہر اتحریک نا ہر اول دستہ ورناک مریر، قوم اوفتا پشت آ مرے و دانشور فکری راہشونی نا فرض ءِ پورو کیر تو او تحریک ءِ دنیا نا ہچ ءُ واک اس چٹفنگ یا نزور کننگ کپک، مقبوضہ کشمیر نا ورناک کاٹم آ کفن تفسا میدان آپیش تمانو،آزاد کشمیرنا ورناتا ہم فرض ءِ کہ او تحریک آجوئی کشمیر نا سرسہبی کن تینا فرض ءِ پورو کیر۔ اوداہیت ءِ ایوان صدر مظفر آباد اٹی زالبول و ورناتا چندی ڈل و میڈیا نا نمائندہ غاتون گپ و تران کرسا پارے۔ صدر آزاد کشمیر پارے کہ مقبوضہ کشمیر اٹی جاری آجوئی و حق خودارادیت نا تحریک اسہ فیصلہ کن ءُ مرحلہ سے ٹی پترینگانے و کشمیر نا غیور و دلیر الس”اب یا کبھی نہیں“ نا جوزہ و عزم اتون جہد کننگ ءُ، ہرانا سرسہبی المیءِ، تحریک آجوئی کشمیر اٹی بڑزکو تعلیم یافتہ انجینئر ز، ڈاکٹرز و پی ایچ ڈی اسکالر آتا اوار مننگ دا ہیت انا شاہدی ءِ کہ کشمیری الس خاص وڑاٹ ورناک تینا آخبت ءِ تحریک آجوئی نا سرسہبی تون گنڈانو۔ صدر ورناتیا زور شاغا کہ او تینا تعلیم، ملازمت و واپار تون مقبوضہ کشمیر اٹی جاری تحریک نا بشخ مرسا تینا ایلم و ایڑھ تا جہد ءِ مون آ دیر و سوشل و روایتی میڈیا نا کمک اٹ بھارتی بیدادی ءِ تالان کرسا کشمیری تا توار ءِ دنیا اسکان سرکیر۔