برطانیہ ٹی پاکستان نا ہائی کمشنر محمد نفیس ذکریا نا برطانوی کانود ساز آتون گپ و تران

اسلام آباد۔ 11 مئی (اے پی پی) برطانیہ ٹی پاکستان نا ہائی کمشنر محمد نفیس ذکریا پارینے کہ جہانی اقتصادی سرجز آک داسہ ایشیانا کنڈا ہِننگ ءُ، ایشیاء ٹی پاکستان ءِ منفرد جغرافیائی و تزویراتی حیثیت اس دوئی ءِ۔ اوداہیت ءِ لیبر پارٹی نا پنی آ پارلیمنٹ نا باسک لائیڈ ٹونی ہرا قطبی آئر لینڈ اکن شیڈو سیکرٹری ءِ، تون گپ و تران کرسا پارے ہراپاکستانی ہائی کمیشن اٹی اوڑتون اوڑدہی کرے۔ محمد نفیس ذکریا پارے کہ ایشیا ٹی پاکستان ءِ منفرد جغرافیائی تزویراتی حیثیت اس دوئی ءِ ہراقدرتی وڑاٹ علاقائی اقتصادی ہند و توانائی نا راہداری نا آسراتی ءِ فراوان کننگ کیک۔ اوشیڈو سیکرٹری ءِ پاکستان اٹی ساڑی آ پیش رفت، زرکاری نا گمان و کاروباری وارخواہی تا بارواٹ پارے ہراڑان برطانیہ فائدہ ہرفنگ کیک۔ داکان مست پاکستانی ہائی کمشنر تون برطانوی کانود ساز و پاکستانی کمیونٹی نا باسک آک ہم اوڑدہی کریسر۔ اوفتے ٹی یورپی پارلیمان نا باسک جوہن ہوارتھ، لیبر پارٹی نا شیڈو وزیر خزانہ اینی لایز ڈوڈز و شیڈووزیر تعلیم میٹ رودائسک اوار ئسر۔ اوڑدہی ٹی ہڑتوم آ کنڈآتا تعلقداری، واپار و زرکاری نا بشخ اٹی برطانیہ وپاکستان نا نیام اٹ کمکاری تون اوار تین پہ تینی است خواہی نا معاملہ غاتیا گپ و تران مس۔ پاکستانی ہائی کمشنر برطانوی کانود ساز آتے پاکستان اٹی مروک آ پیش رفت آن معلومدار کرسا پارے کہ ملک اٹی واپار و زرکاری کن سازگار ءُ چاگڑد اس فراوان کننگانے و برطانیہ نا پوریا گر و زرکارآک داوارخواہی تیان پبی فائدہ ہرفنگ کیرہ۔