لاہور۔ 08 مئی (اے پی پی) لاہور اٹی چارشنبے نا سہب اتون داتا دربار نا پیشن پولیس وین نا خڑک دھماکہ ٹی 5 پولیس کارندہ غاتون اوار 8 بندغ تپاخت کریر و 25بندغ ٹھپی مسنو۔ داتا دربار نا گیٹ نمبر 2 نا پیشن سلوک ایلیٹ فورس انا گاڈی نا خڑک آ اناگت زور دار دھماکہ مس ہراٹی پولیس وین پورو وڑاٹ بھس مس و خڑک انا ماڑی تا شیشہ غاک ہم پنار۔ دھماکہ نا دمدستی حوال آ ریسکیو 1122 تون اوار ایلو امدادی ٹیمک موقع غا سرمسر و اوفک دھماکہ ٹی تپاخت کروک آ پولیس کارندہ و ایلو بندغ آتا لاش تے میو ہسپتال لاہور آ مون تسنو وخت اس کہ 20 آن زیات ٹھپی مروک آتے ہم میوہسپتال آ سرکننگانے۔ واقعہ نا دمدستی پد ڈی آئی جی آپریشنز لاہور اشفاق احمد و ڈی سی لاہور صالحہ سعید ئسک ہم موقع غا سرمسر و اوفک حادثہ نا جاگہ نا دورہ ءِ کریر۔ اوکان پد ڈی آئی جی آپریشنز لاہور اشفاق احمد میو ہسپتال لاہور نا دورہ ءِ کرے ہراڑے او دھماکہ ٹی ٹھپی مروک آتاجانپڑسی ءِ کرے۔ داوخت آ او میڈیا تون گپ و تران کرسا پارے کہ داتا دربار نا پیشن سیکورٹی نا فول پروف بست و بند کننگاسس ہرانا سوب آن دہشت گرد آتے داتادربار نا تہہ ٹی ہِننگ نا موکل ملنگ کتو۔ اوپارے کہ دھماکہ ٹی ٹھپی مروک آتے درمان نا آسراتی تننگ انگ ءِ۔ انسپکٹر جنرل پولیس پنجاب کیپٹن (ر) عارف نواز خان داتا دربار دھماکہ نا جاگہ نا دورہ ءِ کرے۔ دورہ غان پد میڈیا تون گپ و تران کرسا اوپارے کہ دھماکہ ٹی 5 پولیس کارندہ غاتون اوار 8 بندغ تپاخت کرینو۔ پنچ می پولیس کارندہ نا تعلق ایلیٹ فورس آن ءِ وخت اس کہ 25نا خڑک بندغ ٹھپی مسنو۔ اوپارے کہ دھماکہ کن 7 کلونا خڑک دھماکہ خیز مواد آتے کاریم اٹ اتنگا۔ اوپارے کہ حادثہ نا جاگہ غان غٹ شاہدی تے یکجا کننگانے وخت اس کہ ایلو ٹیمک پین شاہدی یکجا کننگ ءُ۔ اوپارے کہ داتا دربار نا پیشن سیکورٹی نا فول پروف بست وبند کننگاسس ہرانا سوب دہشت گرد آتے داتا دربار نا تہہ ٹی ہِننگ نا موقع ملنگ کتو داحالیت اٹ زیات جانی نسخان مننگ کریکہ۔ اوپارے کہ اہم شاہدی یکجا کننگ انگ ءِ و دھماکہ نا بارواٹ زوت سرجم آتیان معلومدار کننگک۔
