اسلام آباد۔ 08 مئی (اے پی پی) چیئرمین سینیٹ محمد صادق سنجرانی لاہور داتا دربار نا خڑک آ ایلیٹ فورس انا گاڈی آ مروک آ دھماکہ نا ترند انگا لوز آتے ٹی مذمت ءِ کرسا پارینے کہ دہشت گرد آک ملک انا امن و ایمنی ءِ لتاڑسا تینا گندہ انگا مسخت آتے ٹی سرسہب مننگ کپسہ۔ اوبمب دھماکہ ءِ دہشت گرد آتا لغوری کارروائی و شکست کنوک ذہنیت اس گوندا۔ دھماکہ ٹی چندی بندغ آک شہید و ٹھپی مسر۔ چیئرمین سینیٹ شہید آتا خاہوت آتون ہڑزخواہی کرسا اوفتا بخشش و ٹھپی مروک آ کارندہ غاتا زوت جان جوڑی کن دعا ہم کرے۔ ڈپٹی چیئرمین سینیٹ سینیٹر سلیم مانڈوی والا، سینیٹ اٹی قائد ایوان سینیٹر شبلی فراز، سینیٹ اٹی قائد حزب اختلاف سینیٹر راجہ محمد ظفر الحق ئسک ہم لاہور دھماکہ نا ترند انگا لوز آتے ٹی مذمت ءِ کرسا شہید آتے کن بخشش نا دعا کریر۔
