گلگت۔ 07 مئی (اے پی پی) وزیراعلیٰ گلگت بلتستان حافظ حفیظ الرحمان نا کماشی ٹی گلگت بلتستان ڈویلپمنٹ ورکنگ پارٹی (جی بی ڈی ڈبلیو پی) انا دیوان اس اڈ ہلک۔ ہراٹی 3 ارب 55 کروڑ 61لکھ روپئی مالیت نا 7 ڈٹ آتا منظوری ءِ تننگا۔ دا ڈٹ آتے ٹی محکمہ برقیات نا منظور کروک آ 5 ڈٹ آتا جم خڑچ 2ارب 20 کروڑ 81 لکھ، گلگت ڈویلپمنٹ اتھارٹی نا منظور کروک آ ڈٹ انا جم خڑچ 93کروڑ 79 لکھ، محکمہ تعمیرات نا ڈٹ آتا جم خڑچ 41 کروڑ روپئی ءِ۔ محکمہ برقیات نا ڈٹ آتیٹی گلگت بلتستان نا چندی ضلع غاتے کن 13میگاواٹ نا ڈیزل جنریٹرآتا ہلنگ و تخنگ داکان بیدس 2 میگاواٹ ہائیڈرو پاور پروجیکٹ بٹوراپھسو گوجال نا جوڑ جاڑ و حسن آباد پاور پروجیکٹ نا اپ گریڈیشن، 1 میگاواٹ ہائیڈرو پاور پروجیکٹ چھلت نگر نا بحالی و 2 میگاواٹ ہائیڈرو پاور پروجیکٹ سمائر نگر نا منظوری ءِ تننگا۔ سینٹری سیوریج سسٹم بمعہ ٹریٹمنٹ پلانٹ زون 2 و 3 نا ڈٹ آتا ہم منظوری ءِ تننگا۔ محکمہ تعمیرات نا منظور کروک آ ڈٹ آتے ٹی چھمو گڑھ آن عالم برج روڈ انا ودکی و میٹلنگ تون اوار حلقہ 3انا چندی شاہراہ تا میٹلنگ و ودکی نا ڈٹ انا ہم منظوری ءِ تننگا۔ گلگت بلتستان اٹی بجلی گھر(پاور پروجیکٹس) ندی نالہ غاتے ٹی جوڑ جاڑ کننگانے، سیل اٹی دیر کم مننگ نا سوب آن بجلی گھر تا کاریم نا کچ اٹی کمتی مریک و باسنی تیٹی نوکاپ نا گڑتی مریک ہرافتے مون آ تخسا ڈیزل جنریٹر ہلنگ نا منظوری ءِ تننگانے تانکہ ضرورت نا وخت آ تھرمل جنریٹر آتا کاریم اٹ اتنگ مرے۔ و ہلہلئی حالیت آتے ٹی بلیک آؤٹ آن بچنگ مرے۔ محکمہ برقیات نا کنڈآن تھرمل جنریٹرز آتا ہلنگ کن 9 تُو انا وخت خواہنگا۔ وزیراعلیٰ گلگت بلتستان حافظ حفیظ الرحمان 9 تُو ان امدآن اختلاف کرسا 6 تُو انا گونڈ ءُ وخت اسے ٹی تھرمل جنریٹرآتا ہلنگ ءِ عمل اٹ اتنگ و فعال کننگ نا پرمان تس۔
