اسلام آباد۔ 07 مئی (اے پی پی) بنجائی وزیر ریلوے شیخ رشید احمد پارینے کہ ساڑی حکومت مال بردار ریل گاڈی تا کچ اٹی ودکی کرینے، تھرکول اسکان بی اوٹی بنداو آ ٹریک شاغنگ و ریل گاڈی چلیفنگ انگ کن کاریم کننگ اُن۔ نجی کمپنیک دا چرجوئی ٹی است خواہی نا درشانی ءِ کرینو۔ سے شنبے نادے آ ایوان بالا ٹی سوج آتا ورندی ٹی او پارے کہ داوخت آ ہردے اوسطا12فریٹ ریل گاڈی کراچی آن چندی شار تیکن چلینگ انگ ءُ و ہروخت 60 فریٹ ریل گاڈی ٹریک آ مریرہ۔ اوپارے کہ نن فریٹ ریل گاڈی تے ہشت آن 12کرینن، تھرکول اکن ہم ریل گاڈی چلیفنگ نا ڈٹ آ کاریم مننگ ءِ و بی او ٹی نا بندا و آ دا کاریم ءِ کننگ انگ ءِ۔ دا چرجوئی ٹی نجی بشخ انا کمپنیک جوڑ کبو، چلیفبو و گدریفبو انا نظام نا رداٹ دا ڈٹ اٹی زرکاری کننگ خوارہ۔ اوپارے کہ 1800 کلومیٹر ایم ایل ون ڈٹ آ پیش رفت مسنے۔ دا ڈٹ انا پوروی آن پشاور آن کراچی اسکان ریلوے پھاٹک چٹک و سگنل نا ہم پوسکن ءُ نظام اس بریک۔ اوپارے کہ پاکستان ریلوے ملک اٹی گڑاتا اتنگ و دننگ اٹ ہم ءُ کڑد اس ادا کننگ ءِ و نن وزارت صنعت و پیدوار کن درآمد کروک آ کھد ہم چندی بشخ آتے ٹی سرکرینن۔ اوپارے کہ کوئٹہ۔زاہدان نا نیام اٹ ٹریفک جوان مننگ ءِ و پاکستان و ایران نا نیام اٹ ہشت آن دہ ٹرین چلینگرہ و دا ٹرین تا کمک اٹ ایران آن پاکستان اٹی تارکول و گندھک وخت اس کہ پاکستان آن ایران برنج و تازہ سوزی گدریفنگک۔
