اسلام آباد۔ 07 مئی (اے پی پی) خیبرپختونخواٹی اوار مروک آ مسکوہی قبائلی علاقہ غاتا 16حلقہ غاتے ٹی صوبائی اسمبلی نا گچین کاری تیکن پندار کاغد آتے پنچ شنبے آن ریٹرننگ آفیسر آتون جمع کرفنگ مریک، دا حلقہ غاتے ٹی پولنگ 2جولائی آ مریک۔ الیکشن کمیشن نا کنڈآن جاری شیڈول نا رداٹ پی کے 100 آن پی کے 115 اسکان نا 16 گچین کاری حلقہ غاتے ٹی گچین کاری تیٹی بشخ ہلنگ کن پندار کاغد آتے سے شنبے نادے آ ریٹرننگ آفیسر تا کنڈآن جاری کننگا وخت اس کہ پنچ شنبے 9 آن 11مئی اسکان دا پندار کاغد آتے ریٹرننگ آفیسر آتون جمع کرفنگ مریک۔ پندار اومیتدار آتا پن تے 12مئی آ شینک وخت اس کہ ریٹرننگ آفیسر آتا کنڈآن اوفتا جانچ پڑتال 18 مئی اسکان مریک۔ پندار کاغد آتے منظور یا مسترد کننگ نا فیصلہ غاتا برخلاف خواست 22مئی وخت اس کہ اپیلٹ ٹربیونل نا کنڈآن دا خواست آتیا فیصلہ 27 مئی اسکان مریک۔ اومیت دار آتا نظرثانی مروک فہرست ءِ 28 مئی آ جاری کننگک۔ اومیتدار آتا کنڈآن پندار کاغد آتے 29 مئی آ پدی ہلنگ مریک وخت اس کہ اومیتدار آتے گچین کاری نشان 30 مئی آ تننگک وخت اس کہ ایلو کنڈ الیکشن کمیشن اسلامی جمہوریہ پاکستان نا دستور و گچین کاری کانود نا رداٹ دا حلقہ غاتے ٹی پوسٹنگ و ٹرانسفر آ پابندی خلکونے۔ اسہ ہم حکومتی شخصیت اس یا گچین مروک آ نمائندہ اس ہرافتے ٹی لوکل گورنمنٹ نا نمائندہ ہم اوارے پولنگ اسکان اسہ ہم شونداری اسکیم اسے نا پڑو ءِ کننگ کپسہ۔
