اسلام آباد۔ 25جنوری (اے پی پی) صدر مملکت ممنون حسین پارینے کہ ساڑی حکومت آجوئی صحافت ناقدر ئِ کیک و خوائک کہ اخبار آک الس ئِ مبنی برحق خبر سرکیر۔ملک اٹی ذرائع ابلاغ نا معیار ئِ گچین جوڑ کننگ کن پریس کونسل نا کڑد بے کچ اہم ئِ ، اونا زمواری ئِ کہ او قومی مسخت آتا پوروی و رائے عامہ ئِ حق آتیان باخبر تخنگ کن تیناکڑد ئِ ادا کے۔ داہیت ئِ او ڈاکٹر صلاح الدین مینگل نا سروکی ٹی پریس کونسل آف پاکستان نا ڈل اتون ہیت وگپ کرسا پارے ہراایوان صدر اٹی اوڑتون اوڑدہی کریر۔ صدر مملکت پارے کہ پریس ئِ راج انا بیداری و بدعنوانی نا برخلاف رائے عامہ ئِ ہموار کننگ کن جہد کروئی مرے۔ اومستی پارے کہ کرپشن و بدعنوانی بیرہ مالی ہی آخا بلکن اخلاقی ہم مریک۔ اگہ خلقت تینا زمواری تے جوان وڑاٹ ادا کپس تو دا ہم بدعنوانی ٹی بریک و ہر ادارہ نا سروک تینا ادارہ نا کارکڑد نا زموار ئِ۔ صدر ممنون حسین پارے کہ ساڑی حکومت آجوئی صحافت نا قدر ئِ کیک و خوائک کہ اخبارآک الس ئِ سچائُ خبر ایتر۔ تنقید ذرائع ابلاغ نا حق ئِ ولے او معیاری و بے لاگ بایدے مرے۔اواومیت ظاہر کرے کہ پریس کونسل آف پاکستان میڈیا نا معیار ئِ گچین جوڑ کیک و حکومت ہم دا چرجوئی ٹی پورو کمک کیک۔ اووزارت اطلاعات ئِ پارت کرے کہ او پریس کونسل ئِ دفتراس ایتے۔ ڈل انا ایلو باسک آتیٹی رفیق حمد ڈاہر، سید اقبال جعفری، ناصرزیدی، عائشہ اکرام، سید ہارون شاہ ، شاہجہان سید و محمد ابراہیم خان اوار ئسر۔
