کوئٹہ۔ 05مئی (اے پی پی) ڈپٹی اسپیکر قومی اسمبلی قاسم خان سوری رمضان المبارک اٹی کنوئی آ گڑاتا نہاد آتے ٹی ناروا و بے پناہ ودکی نا رجحان نا رداٹ مست آن ہی ڈپٹی کمشنر کوئٹہ کیپٹن (ر) طاہر ظفر عباسی ءِ پرائس کنٹرول کمیٹی تے فعال کننگ و منافع خور آتا برخلاف سخت ایکشن ہلنگ نا پارینے۔ ڈپٹی اسپیکر قومی اسمبلی ٹیل فون آ گپ و تران اٹی ڈپٹی کمشنر کوئٹہ تون گپ و تران کرسا پارے کہ اسٹ اسے ہم السی مجبوری تیان فائدہ ہرفنگ نا موکل تفنہ۔ پرائس کنٹرول کمیٹی نا دمدستی میٹنگ اس بایدے بٹنگ انگے، و دا غٹ گراں فروش آتے بایدے وارننگ تننگے۔ ڈپٹی کمشنر کوئٹہ کیپٹن (ر) طاہر ظفر عباسی ڈپٹی اسپیکر قومی اسمبلی ءِ پارے کہ انتظامیہ کم و ود اسہ ہفتہ آن روا نہاد آتے کن غٹ مارکیٹ آتا سروے و دوکاندار آتون میٹنگ کننگ ءُ۔ ڈپٹی اسپیکر قومی اسمبلی مستی پارے کہ دا بندغ آک ذخیرہ اندوزی کرسا یکدم گڑا ءِ کبین کیرہ ہراڑان کنوئی آ گڑاتا نہاد آک ودرہ۔ داخلقت ءِ مہالو آن وارننگ جاری کرسا سُو، فروٹ، سوزی، اِلار، سی و ایلو کنوئی آ گڑاتا نہاد آتے کنٹرول کننگے۔ منافع خور آتے اگہ مست بٹنگسا و پرائس کنٹرول کمیٹی ٹی سختی اٹ وارننگ تننگے تو بھلو پرخ اس تمک و نہاد آک آسمان اسکان سرمفسہ۔ ڈپٹی کمشنر کوئٹہ ڈپٹی اسپیکر قومی اسمبلی ءِ سرجم پارے کہ ککڑ نا نہاد آتے کوئٹہ ٹی بھاز ودفنگاسس انتظامیہ اونا فارمولہ ءِ پک کرے۔ اخس کہ ریٹ ملتان اٹی ءِ اوٹی ٹرانسپورٹیشن و ایلو خڑچ آتے شاغسا کٹیا تون سپلائرز و ریٹیلرز کن قیمت فروخت ءِ فکس کننگانے۔ سُو انا نہاد آتا بابت اینو انتظامیہ نا میٹنگ اس مسنے۔ ایٹ انا سُو 900 روپئی فی کلو سودا مسکہ و اینو اسہ کلو ءِ نن 780 روپئی آ فکس کرینن۔ خراس نا سُو ہڈ والا 380 روپئی کلو و بیدس ہڈ 480 روپئی فکس کرینن۔ سوزی نا خریدو فروخت نا بابت ننا اسہ جتا ءُ مجسٹریٹ اسے ہرا ہردے سہب انا نماز نا وخت آ منڈی آ کاہک و ہموڑے ہرا بولی لگک او دے نن المی کننگ اُن کہ ہرا نہا د سوزی منڈی ٹی ءِ مارکیٹ اٹی ہم اوڑان 2 یا 3 روپئی کلو بڑزا سودا مرے۔
