اسلام آباد۔ 05مئی (اے پی پی) وزیراعظم نا خصوصی کمکار اطلاعات ونشریات ڈاکٹر فردوس عاشق اعوان یک شنبے نادے آ پاکستان ٹیلی ویژن تون گپ و تران کرسا پارینے کہ القادر یونیورسٹی وزیراعظم عمران خان نا ریاست مدینہ نا اسہ اہم ءُ مزل نا نشان اسے، نن ورناتا رابطہ غاتے ودفسا پیدواری عمل اٹ ودکی کننگ کینہ، یونیورسٹی نا جوڑ کننگ آن پوسکن آ تعلیم تون اوار اوار مذہبی رواداری و مذہبی پٹ وپول تون اوار صوفی از م ءِ مون آ دننگ رسینگک۔ اوپارے کہ مسلم امہ تینا میرات آتے اویلوفتا دوٹی تسنے و وزیراعظم اوفتے پدی اتنگ خواہک، القادر یونیورسٹی دنیا تون مقابلہ کننگ و ہم گرنچ مننگ کن ننے علامہ اقبال و قائد اعظم نا ارشاد و خواجہ ﷺ نا تعلیمات آتے مون آ تخسا کاریم کروئی مریک۔ وزیراعظم اینو یونیورسٹی نا بنداو ءِ تخنگ کن ہِنپننگ ءِ بلکن او بج اس خلنگ کن ہِننگ ءِ ہراڑان آخبت اٹی پاکستان نا حقی دروشم ءِ تالان کننگ اٹ کمک ملک، اوپارے کہ پبلک پرائیویٹ شریداری آن دا ڈٹ ءِ پورو کننگک ہراڑے مذہب آتا پٹ وپول تون اوار اوار خواجہ ﷺ نا تعلیمات آتیا پٹ وپول مریک و دا دنیا ٹی اسلام نا اصل دروشم ءِ پیش کیک انتئے کہ مستین اٹی اسلام ءِ دہشت گردی تون گنڈنگا وخت اس کہ اسلام پورو ہم آہنگی، مذہبی رواداری و ایلمی نا سبخ ایتک۔ ڈاکٹر فردوس عاشق اعوان پارے کہ دا ادارہ وزیراعظم نا سوچ اتون ہم گرنچ ءُ ادارہ اسے، وزیراعظم عمران خان نا پوسکن آپاکستان نا سوچ و اونا مزل نا کنڈا پیش قدمی ٹی دا یونیورسٹی اہم ءُ کڑد اس ادا کیک۔ داکان بیدس القادر یونیورسٹی بروک آ چین تے قرآن و سنت آن ہم روشناس کرفک، ہندا دانا بنداوی مسخت ءِ، یونیورسٹی راج انا جوڑ کننگ اٹ بھاز کمکار مریک ہراڑان راج اٹی بین المذاہب ہم آہنگی و رواداری ءِ مون آ دننگ اٹ ہم کمک رسینگک۔
