اسلام آباد۔ 05مئی (اے پی پی) لاہور لٹریری فیسٹیول (ایل ایل ایف) نا چارمیکو ایڈیشن نیویارک اٹی چٹانے، داٹی پاکستان نا آرٹ و لٹریچر نا چاہندار آک اقوام متحدہ ٹی پاکستان نا سفیر ملیحہ لودھی تون گپ و تران کریر، سفیر نا پاننگ ئس کہ دا سالانہ دود ساڑی آ سال تیٹی ملک اٹی دودوربیدگی بحالی نا درشانی ءِ، پاکستان نا دودوربیدگی لینڈ سکیپ اٹی آرٹ،سازوزیمل، لٹریچر و سینما ٹی بھلو کچ اسے آ تخلیقی سرجزآتے ٹی ودکی مسنے۔ داخیال آتا درشانی ءِ او نیویارک اٹی ایشیا سوسائٹی نا بھلو ہال اسے ٹی بھلو کچ اسے ٹی ساڑی فیسٹیول نا بشخ ہلوک آتیان تران اٹی کرے، دا میلہ ایشیاء سوسائٹی نا اواری اٹ اڈتننگاسس۔ ترانکارآتا بھلو کچ اس پارے کہ لاہور ءِ پاکستان نا دودوربیدگی ہنداس گوندسا پاریر کہ ایل ایل ایف دا بابت آ پوسکن آ آئڈیا تے مون آ ایسونے و او پاکستانی ٹیلنٹ ءِ امریکی بشخ ہلوک آتا مون آ پیش کرینے۔ اوپارے کہ فیسٹیول اٹی دودوربیدگی زند انا عکس ءِ پیش کننگانے۔ ملیحہ لودھی پارے کہ ایل ایل ایف نا شاندار سفر پاکستان نا بھلو دانشورانہ توانائی اسے نا عکاس ءِ ہراکہ تخلیقی توار تا فیوژن اٹی پیدوار ءِ، دا تخلیقی توارک اسہ زندہ ءُ قوم اسے نا نشان، پوسکن آ پاکستانی جنریشن نا پت انا درشان و و اوفتا میرات نا گمر ءِ، ہرا جہانی میرات تون گنڈوک ءِ۔ ملیحہ لودھی پارے کہ آرٹ و لٹریچر ہندن ءُ بشخ ءُ ہرافتا گیشتر ستاءِ کننگانے و داہم بدلی نا ذریعہ اسے، دا ننا سوچ ءِ بدل کیک، ننا بدل مروک آ چاگڑد نا جاچ ءِ ہلیک و غٹ آن زیات دا کہ داڑان جتائی نا دیوال تا جاگہ غا مفاہمت نا پول تفنگک۔ ایل ایل ایف نا سی ای اورازی احمد پارے کہ ایل ایل ایف ایشیاسوسائٹی نا کمک اٹ نیوک یارک اٹی پاکستانی ٹیلنٹ و درشانی نا خزانہ ءِ پیش کرینے۔ او ٹیم باسک خاص کر انیلہ شاہ و نصرت رحمان نا کوشست آتیا اوفتا منت واری ءِ ہرفے۔ داوخت آ ایشیاسوسائٹی نا گلوبل پرفارمنگ آرٹ انا و کلچر نا ڈائریکٹر ریکل کوپر باسک و سامعین تے فیسٹیول اٹی بشخ ہلنگ آ بخیر اٹ پارے۔
