پاکستان اٹی سیکورٹی ، انفراسٹرکچر و کاروبار دوست چاگڑد نا بشخ آتیٹی نمان گچینی بس، تاکاشی کورائی
اسلام آباد۔ 25جنوری (اے پی پی) وزیراعظم محمد نواز شریف پارینے کہ پاکستان جاپان ئِ خڑک انا سنگت و باپت اقتصادی شریدار تکک، آپریشن ”ضرب عضب“ اٹی ملک اٹی امن وایمنی نا حالیت آتیٹی نمان گچینی بسنے و اومیت ئِ کہ جاپان دا رداٹ سفری ایڈوائزری فہرست اٹی پاکستان نا اوار مننگ نا جاچ ئِ ہلیک۔ اوداہیت ئِ پاکستان اٹی جاپان نا سفیر تاکاشی کورائی تون چارشنبے آ ایوان وزیراعظم اٹی ہیت وگپ کرسا پارے۔ وزیراعظم ہڑتوم آ تعلقداری تیا زور شاغسا پارے کہ پاکستان ہڑتوم آ ملک آتا نیام اٹ خاص کر واپار، زرکاری، بنداوی ڈھانچہ و توانائی نا بشخ آتیٹی کمکاری ئِ ودفنگ نا خواہندارئِ۔ اوپارے کہ ہڑتوم آ ملک آتے آزادانہ واپاری معاہدہ غا ہیت و گپ نا بناءکننگ نا گرج ئِ، جاپان پاکستان ئِ اونا مسابقت کار ہرا جاپانی منڈی تسکان آزادانہ رسینگ تخرہ، نا بریبر اتنگ کن تینا عارضی ٹیرف گام گیج آتا رداٹ پاکستانی ٹیکسٹائل کن مسٹ آن چار سال نا چھوٹ تننگ آ ہم سجفنگ کیک۔ وزیراعظم پاکستان اٹی زرکاری کن جاپانی کمپنی تا خیرمقدم ئِ کرسا پارے کہ داڑآن تیار مصنوعات آتا پیداوار کن پاکستانی صنعتی بشخ انا کاریم نا کچ اٹی ودکی مریک۔ جاپان نا سفیر پاکستان نا اقتصادی شونداری نا ستائِ کرسا پارے کہ خاص کر جاپان اٹی پاکستان نا تاثر کاروبار دوست ملک اٹی بدل مسنے۔ اوپارے کہ جاپان انوسٹمنٹ سیکورٹی، انفراسٹرکچر و کاروبار دوست چاگڑد ئِ بھاز زیات اہمیت ایتک و دا ہر مسٹ آ بشخ آتیٹی پاکستان نمان گچینی دوئی کرینے۔
