اسلام آباد۔ 04مئی (اے پی پی) انسان خدانا خوف انا سوب آن جوان انگا کاریم تا کنڈابریک، پاکستان نا آئین و کانود بھاز جوان ءِ، قوم تا نظم و ضبط اٹی اوفتا دودوربیدگ نا اہم ءُ کڑد اس مریک، کانود نا ساڑی مننگ تون اوار اوار اوڑا عملدرآمد ہم المی ءِ، نیزگاری ٹی ودکی نا بھلا سوب درمان نا خڑچ آک ءُ، ہفتہ نادے آ انسانی حق کمیشن نا جان جوڑی نا بابت رپورٹ ءِ جاری کننگ نا دود آن تران کرسا صدر مملکت ڈاکٹر عارف علوی پارے کہ ای زند اٹی بھاز انگا کاریم تے کننگ نا کوشست کریٹ تانکہ راج انا راجی آسراتی ٹی کڑد اس ادا کننگ کیو۔ اوپارے کہ ای کانود نا اعتبار اٹ سجفیٹہ کہ خلقت جوان ءُ یا خراب ءُ کاریم انت اکن کیرہ تو کنا سمجھ اٹ داہیت بس کہ خلقت خدانا خوف انا سوب آن داوڑ کیرہ انتئے کہ او پہہ مریرہ کہ قیامت نا دے آ اوفتا جواب تروئی تمک ہنداخاطران خدانا خوف انا سوب آن خلقت جوان انگا کاریم تا کنڈا بریرہ۔ اوپارے کہ کانود المی ءِ چائے او قرآن پاک نا کانود مرے یا پاکستان نا آئین۔ ملک اٹی آئین نافذ ءِ و داٹی ہر کس کہ ترمیم کننگ خوائے کننگ کیک۔ اوپارے کہ پاکستان نا کانود ہنداخہ جوان ءِ کہ اگہ داڑاعمل مسکہ تو شاید داٹی ترمیم کننگ نا ضروت ہی متوکہ۔ صدر مملکت کانود آ عملدرآمد نا گرج آ زور شاغسا پارے کہ ننے کانود آ عملدرآمد کرفوک آ ادارہ غاتا کاریم نا کچ اٹی ودکی نا گرج ءِ و پولیس، پراسیکیوشن تون اوار ایلو ادارہ غاتا کچ ءِ ودفنگے۔ ڈاکٹر عارف علوی پارے کہ ہنداوڑ راج انا شونداری کن جان جوڑی نا بشخ انا شونداری المی ءِ و جان جوڑی نا بشخ اٹی ایل ایچ ویز نا کچ ءِ ودفنگے۔ اوپارے کہ ہراتم ای اولیکو وار پارٹی نا پلیٹ فورم آن گچین مسوٹ تو کراچی ٹی راجی بشخ انا شونداری، تعلیم، جان جوڑی و دیر انا فراوانی نا کنا حلقہ نا ڈٹ آتے کن سندھ حکومت کنتون کمک کرے ہرا راجی سمجھداری نا شاہدی اسے انتئے کہ کنے گچین کروک آتے کنتون اومیت آک وابستہ ئسر و ای کوشست کریٹ کہ ای اوفتیا عمل کننگ کیو۔ اوپارے کہ راج ننے تعلیم و روزگار تسنے۔
