اسلام آباد۔ 04مئی (اے پی پی) پاکستان اقوام متحدہ نا سلامتی کونسل اٹی اصلاحات نا بابت بے بنداو گام گیج آتیا ن پانادکرسا ادارہ نا کارکڑدگی ٹی گچینی کن درجہ بدرجہ گام گیج آتا سلاہ پیش کرینے۔ اقوام متحدہ ٹی پاکستان نا آخبتی مندوب ملیحہ لودھی خبڑدار کرینے کہ سلامتی کونسل نا آخبتی باسک آتا کنڈآن پانزدہ باسکی باڈی ٹی اصلاحات نا ساڑی آ کوشست آتیان سلامتی کونسل ءِ زیات جمہوری، نمائندہ ادارہ، شفاف وگچین جوڑ کننگ نا عمل زہمی مریک۔ سلامتی کونسل اٹی اصلاحات نا مسخت آتے کن بین الحکومتی مذاکرات نا بابت شرہ ٹی بشخ ہلسا پاکستانی سفیر پارے کہ اصلاحات نا بابت بنداوی اختلاف آتا درشانی مریک و سلامتی کونسل نا باسک آتا اختلاف آتے بیان تا بنداو آ چٹفنگ مفک۔ اوپارے کہ کڑدہ غاتا اختلاف آتا چٹفنگ کن درجہ بدرجہ گام گیج نا گرج ءِ و عدم اتفاق رائے آن پاناد کروئی مریک۔ اوپارے کہ بے بنداو گام گیج آتیان نئے بیرہ ادارہ نا کارکڑدگی زہمی مریک بلکن سلامتی کونسل اٹی اصلاحات نا جامع عمل ہم بھاز بے وڑ زہمی مننگ کیک۔ اوپارے کہ اقوام متحدہ نا اصلاحات نا ایجنڈا غان پد ہم باسک ملک آک گڑاس سرجم آتیا ترندی اٹ بشخ وپانٹ مسنو۔ پاکستانی سفیر پارے کہ گروپ آف فور نا پن اٹ پنی بھارت، برازیل، جرمنی و جاپان ءِ سلامتی کونسل نا آخبتی باسک جوڑ کننگ کن گام گیج کننگ انگ ءِ و دا ملک آک سلامتی کونسل اٹی دہ نشست آتا ودکی نا بابت تینا مہم اٹ ہچ ءُ لچک اس نشان تفننگ ءُ ہرانا رداٹ سلامتی کونسل نا باسک آتا کچ ءِ 10 اسکان ودفنگک ہرافتے ٹی 6آخبتی باسک وخت اس کہ 4بے آخبتی باسک اوار مریرہ۔ اوپارے کہ ایلو کنڈاٹلی و پاکستان نا سرکڑدہ ہی ٹی گروپ نا کنڈآن اتفاق رائے ودی کننگ انگ ءِ کہ آخبتی باسک آتا کچ اٹی ودکی آن سلامتی کونسل زیات موثر مننگ کپک۔ داڑان جمہوریت نا ہم نفی مریک ہرا سلامتی کونسل اٹی گچین کاری نا کمک اٹ باسک آتا چناؤءِ۔ داوخت آ کونسل نا 5آخبتی باسک آتے ٹی برطانیہ، چین، فرانس، روس و امریکہ اوارو وخت اس کہ بے آخبتی باسک آتا کچ دہ ءِ۔ ملیحہ لودھی پارے کہ اصلاحات نا پن آ کثیر الجہتی مسخت آک زہمی مریرہ و داڑان فیصلہ غاتا اختیار منہ خاص انگا ملک آتسکان محدود مریک و دا سہی ءُ فیصلہ اس اف۔ اوپارے کہ اقوام متحدہ ءِ جہانی کہول آ امن و سلامتی نا بابت ویل آتا مون تروک ءِ و کونسل ہم داڑا عمل درآمد ءِ گچین کننگ کپک۔ اوپارے کہ سلامتی کونسل اٹی اصلاحات و کارکڑدگی ٹی گچینی کن جہانی کہول آ امنائی المی ءِ۔
