رینالہ خورد۔ 04مئی (اے پی پی)وزیراعظم عمران خان پارینے کہ ہر پاکستانی ءِ چھت ایتنہ، کچہ انگا آبادی تا جاگہ غا پوسکن آ ٹیکنالوجی نا حامل کثیر المنزلہ ماڑی جوڑ کینہ ہراڑے پورو بنداوی آسراتی دوئی مریک، پوسکن آ پاکستان ہاؤسنگ ڈٹ آن 40 صنعت آتے مون آ دننگ دوئی مریک، مچ آ پاکستان اٹی دا ہاؤسنگ اسکیم ڈٹ ءِ بناکننگ انگ ءِ ہراڑان شرح نمو ٹی ودکی مریک و شونہالی بریک، ورناتے روزگار نا وارخواہی دوبریک و تنخواہ دار تپہ ءِ مارگیج انا کمک اٹ اوفتے اوفتا اُرانا تغ پورو مریک، اللہ ہمو راج ءِ شرف ایتک ہرا اونا حبیب ﷺ نا کسر آ چلینگک، پاکستان ءِ مدینہ نا ریاست نا اصول آتیا سلفنگ اسہ بھاز بھلو تغ اس ئس ہراڑکن کوشست کننگ اُن۔ او ہفتہ نا دے آ رینالہ خورد اٹی پوسکن آ پاکستان ہاؤسنگ ڈٹ انا بنداو نا دود آن تران کریکہ۔ دود آن صوبائی وزیر ہاؤسنگ میاں محمود الرشید ہم تران کرے۔ وزیراعظم رینالہ خورد اٹی پوسکن آ پاکستان ہاؤسنگ اسکیم نا بنداو ءِ تخا۔ وزیراعظم تران کرسا پارے کہ وزیراعلیٰ پنجاب عثمان بزدار ءِ پورو کریڈٹ ایتیوہ کہ اونا ٹیم پبی وڑاٹ پنچ سال اٹی 50 لکھ اُراتا تفنگ نا ننا ہاؤسنگ پالیسی ٹی پبی بشخ شاغار داڑا اوفتے خراج تحسین پیش کینہ۔ اوپارے کہ وزیر ہاؤسنگ میاں محمود الرشید پارے کہ دا کاریم مشکل ءِ تو اگہ دا مشکل متوکہ تو گدرینگوک آ دہ سال اٹی حکومت کروک آک داکاریم ءِ کریرہ، انشاء اللہ غٹ مشکل کاریم تے ننا حکومت کیک۔ وزیراعظم پارے کہ ہراراج اٹ ہراوخت اسکان احساس مفک او راج وخت اس ہم دنیا نا تاریخ اٹی مون آ ہنتنے، یورپ اٹی احساس نظر بریک او نزور تپہ کن فکر کیرہ، اُراغان تعلیم و انصاف ترفنگ نا زمواری ہمو ریاست آک ہلیرہ ہموڑے نیزگار آ بندغ آتون حکومت کانود کمک کیک، نیزگارآتے کن اِرغ نا بست وبند ءِ کیک۔ اوپارے کہ یورپ اٹی داوخت آ ہرا نظام ءِ او سرکار مدینہ ریاست مدینہ ٹی درستی راستی کرفے و فلاحی ریاست مدینہ نا ٹہیفنگ نا بنداو آ اسہ ہزار سال اسکان مسلم دنیا نا امامت نا ذریعہ جوڑ مس۔ اوپارے کہ ریاست مدینہ روم و فارس نا سلطنت آتا ساڑی گری ٹی نیزگار ریاست مننگ آن پد ہم ثابت کرے کہ نزور تپہ نا کمک و زمواری اداکننگ آاللہ نا کنڈان کمک مریک، نزور تپہ ءِ بڑزاہرفنگ آ اللہ ریاست مدینہ ءِ بڑزا ہرفے۔ اوپارے کہ سویڈن، ناروے ڈنمارک اٹی نظام ءِ ہبو تو معلوم مریک کہ مدینہ نا فلاحی ریاست نا نظام آن اوفک دا نظام ءِ ہلکونو ہراڑے ساہدار تا ہم خیال ءِ تخنگک، دا انسانیت نا نظام ننا ئسک۔ وزیراعظم پارے کہ اللہ ہمو راج ءِ شرف ایتک ہرا اونا حبیب ﷺ نا کسر آ چلینگک۔ وزیراعظم پارے کہ پاکستان ءِ مدینہ نا ریاست نا اصول آتیا سلفنگ نا اسہ بھاز بھلو تغ اس ئس، نن داسہ داکوشست ءِ کینہ معاشی حالیت خراب مننگ آن پد ہم نن دا 50 لکھ اُراءِ جوڑ کینہ۔ وزیراعظم داوخت آ پارے کہ کچہ انگا آبادی تا حالیت بے کچ خراب ءِ، داڑکن پروگرام اس بناکننگ اُن، داڑے چین انا کمک آن پوسکن آ ٹیکنالوجی آن کثیر المنزلہ ماڑی تفنگک ہرافتے ٹی بنداوی آسراتی باہم تننگک۔ چین ہندا ٹیکنالوجی نا سوب گوادر اٹی 6 تُو اٹی اِرا ڈٹ ءِ پورو کرے، اگہ دا ڈٹ آتے ٹی دا پوسکن آ ٹیکنالوجی ءِ کاریم اٹ اتنگتوکہ تو دا ڈٹ اِراسال اٹی پورو مسکہ۔ اوپارے کہ پیشن نا ملک آتیان زرکارآک پاکستان اٹی زرکاری کن است خواہی ہلنگ ءُ اوفتے ٹی آسراتی کن زرکاری بورڈ اٹی ڈیسک اس جوڑ کننگانے۔ اوپارے کہ ہاؤسنگ نا کاریم سالانہ بنداو تیا زور ہلیک داسہ نن داکاریم کن پورو تیار اُن، پوسکن آ پاکستان ہاؤسنگ اتھارٹی جوڑ مسنے۔ وزیراعظم پارے کہ ہر پاکستانی نا کاٹم آ اوفتا چھت ننا تغ ءِ۔
