لاہور۔ 04مئی (اے پی پی) وزیراعظم عمران خان پارینے کہ اولیکو وار پاکستان اٹی مچ آ گاڈی تیار مریک، معاشی وڑاٹ مشکل حالیت آتیان پیشن نا زرکاری ٹی ودکی آن پیش تمنہ، چاگڑدی کچٹی آن بچنگ کن الیکٹرک کار اس درستی راستی کرفنگ نا چاری اُن، پیشن نا و ہندی زرکار آتے کاروبار کن حکومت پورو کمکاری نا باوری کرفک، زرکاری نا کسر اٹی بروک آ اڑاند، بدعنوانی و رشوت نا سوب آن داکان فیکٹریک ملائیشیا و دبئی آ منتقل مسر۔ ہفتہ نادے آ داخیال آتا درشانی ءِ وزیراعظم ہائیر اینڈ جے ڈبلیو فور لینڈ انا اِرابھلا ڈٹ آتا بناءِ کننگ نا وخت آ کرے۔ وزیراعظم پارے کہ شش تُو مست نن دا ڈٹ انا بنداو ءِ تخان و اینو داسہ داڑے گاڈی تا جوڑ مننگ بناکرینے داڑا او جاوید آفریدی و اونا ایلم ءِ مبارکبادی پیش کیک۔ اوپارے کہ پاکستان معاشی وڑاٹ اسہ مشکل ءُ وخت اسے آن گدرینگ انگ ءِ، بھلو کچ اسے ٹی وام ہلنگانے، قوم ہریفک کہ دا مشکل آتیان ہمہ پیش تمنہ تو دُن کہ چین آن پاکستان اٹی زرکاری بسنے ہمووڑ زرکاری بننگ آ دا مشکل آتیان پیش تمنہ داڑان زرمبادلہ نا کوڑی تیٹی ودکی مریک، خراج ودک، روزگار نا وارخواہی ودی مریک۔ وزیراعظم پارے کہ جے ڈبلیو فور لینڈ کارپلانٹ نا اولیکومرحلہ ءِ داکان پد اونا ایلو مرحلہ غاک بریرہ و مچ آ گاڈی نا مینو فیکچرنگ داڑے مریک، ہر پڑزہ داڑے جوڑ مریک، اولیکو وار مکمل گاڈی پاکستان اٹی تیار مریک۔ اوپارے کہ وزیراعظم آفس ہم زرکار آت کن آسانی ودی کننگ کن کوشست کیک۔ وزیراعظم پارے کہ زرکاری نا کسر اٹی غٹ آن زیات اڑاند کرپشن و رشوت مسنے۔ ہندا مشکل آتا سوب آن داکان زرکار آک ملائیشیا و دبئی آ ہنسا تینا فیکٹری تے خلیرہ۔ اوپارے کہ خصوصی اقتصادی زون تیٹی زرکاری کروک آ چینی کمپنی تے ون ونڈو آپریشن نا آسراتی تننگک۔
