راولپنڈی۔ 04مئی (اے پی پی) بنجائی وزیر ریلوے شیخ رشید احمد پارینے کہ نن مسافر ٹرین تیٹی گدرینگوک آ سال انا نسبت چار ارب زیات کٹیا کرینن، پاکستان ایئر فورس اتون آئل سپلائی نا معاہدہ ءِ کرینن وخت اس کہ فوج تینتون سلوک مال بردار گاڈی تے ریلوے نا حوالہ کرینے، نالہ لئی و ایم ایل ون ڈٹ آتا پورو کننگ ننا تغ ءِ، غٹ قومی ادارہ غاتے تیل انا فراوانی ریلوے آن کننگ نا پروگرام ءِ۔ داخیال آتا درشانی ءِ او تدوک آ دے سینٹرل ڈیزل لوکوموٹو ورکشاپ اٹی مزور آتیان تران کرسا کرے۔ اوپارے کہ ریلوے بحال مریک تو ملک شونہال مریک، داڑے ٹرک و کنٹینر مافیا غاک ءُ ہرا کچٹی تالان کننگ تون اوار اوار و ویل ہم ودی کننگ ءُ، اوپارے کہ نن ایم ایل ون ءِ سائن کرینن، داڈٹ آن یک و نیم لکھ خلقت ءِ روزگار ملک۔ اوپارے کہ ہراڑے ہراڑے اسٹیشن ارے ہموڑے کواٹر جوڑ کننگک تانکہ ریلوے ملازم آتا رہینگ انگ نا ویل ہمیشہ کن چٹے۔ اوپارے کہ نن ہشت تُو اٹی اسہ روپئی اسے نا ہم امپورٹ کتنون، سی ٹرین چلیفینن، و دا پاکستان نا تاریخ اٹی اولیکو اقعہ ءِ کہ ریلوے نا مزور آک سی ٹرین داڑے جوڑ کرسا چلیفینو۔ اوپارے کہ دُز و لٹ و پل کروک آک ملک ءِ بھاز بے وڑ لٹانو، ریلوے تون اوار غٹ ادارہ غاتے بھس کریر۔
