اسلام آباد۔ 25جنوری (اے پی پی) سلاہکار خارجہ سرتاج عزیز تون چارشنبے آ داڑے اوغانستان اٹی برطانیہ نا سفیر ڈومینک جرمی اوڑدہی کرے۔ پاکستان اٹی برطانوی ہائی کمشنر تھامس ڈریو ہم اوڑتون اوار ئس۔ ہڑتوم آ کڑدہ غاک ہیت و گپ اٹی اوغانستان اٹی امن و سلامتی نا بابت معاملہ غاتیا خیال آتا درشانی ئِ کریر۔ دفترخارجہ نا ترجمان نا رداٹ برطانیہ نا سفیر پارے کہ اونا ملک اوغانستان اٹی امن و سلامتی ئِ مون آ دننگ کن کمکار کڑد ادا کننگ نا خواہندار ئِ۔ ہڑتوم آ کڑدہ غاک اوغانستان اٹی پائیدار امن نا دوئی کن مصالحتی عمل ئِ برقرار تخنگ نا غرض اٹ کوشست آتے برجاہ تخنگ آ امنا کریر۔ سلاہکار خارجہ برطانوی سفیر ئِ پاکستان نا دہشت گردی نا برخلاف جنگ اٹی سرسہبی و اوغانستان اٹی امن و سوگوی ئِ مون آ دننگ و اوغانستان تون تعلقداری تے گچین کننگ نا بابت پاکستان نا خواہش آن معلومدار کرے۔
