اسلام آباد۔ 2 مئی (اے پی پی) مزن وزیر ءِ ھاسیں کمکار برائے اھوالکاری ءُُ شنگ کاری ڈاکٹر فردوس عاشق اعوان ءَ گوشت کہ شہباز شریف ملک ءَ چہ تتکگ ءُُ آئی ءِ دومی برات نواز شریف ملک ءَ چہ تچگ ءِ راھ پٹگ ءِ تیاری کنگ ءَ انت۔ مسلم لیگ (ن) ءَ مرچی مزن وزیر عمران خان ءِ بیان ءِ پد ءَ وتی سروک آناں مٹ کتگ، کرپشن ءُُ جمہوریت ھوری ءَ شُت کت نہ کناں، الس مزن وزیر عمران خان ءِ سروکی ءَ من اَنت ءُُ آئی ءَ را ملک ءِ نامدارتریں لیڈر پھم اَنت۔ اے ھیالانی درشانی آئی ءَ پنچ شمبے ءِ روچ ءَ پاکستان ٹیلی ویژن نیوز ءَ گوں تران کنان ءَ کت۔ عمران خان الس ءَ را سینگ ءَ گوں جنگ ءَ انت ءُُ آواناں آوانی جیڈھ آنی گیواری ءِ تران ءَ کنگ ءَ انت۔ یک جستے ءِ پسو ءَ آئی ءَ گوشت کہ شہباز شریف ءَ را پبلک اکاؤنٹ کمیٹی ءِ چیر مین جوڑ کنگ ءِ واستہ اپوزیشن ءَ چے چے نہ کتگ، پارلیمان ءِ کاروائی ءِ تہ ءَ پینگ جنگ بوتگ ءُُ کانود ءِ جوڑ کنگ ءِ کار ءِ تہ ءَ اوشت ءُُ پارلیمانی کمیٹی تاں جوڑ کنگ نیشتگ، ءُُ گوشنگ کہ شہباز شریف ءَ ابید جمہوریت بیم ءِ آماچ انت۔ آئی ءَ گوشت کہ اپوزیشن لیڈر ءَ ھوار توامیں کرپٹیں مردم آنی دیم ءَ چہ چادر دور اتکگ ءُُ دور آیگ ءَ انت، الس ءِ دیم ءَ راستیں لکا سہرا بوھگ ءَ انت ایشی ءَ چہ الس کوراسی ءَ چہ در کپگ ءَ انت، پروپیگنڈا کنوکیں ءُُ الس ءَ را وتی زاتی سیت ءِ واستہ کارمرد کنوکیں ٹولیگ نوں الس ءِ آمید گس ءَ ایوک بوتگ اَنت۔
