وزیر داخلہ نا میجر جنرل ندیم احمد انجم ئِ بطور آئی جی ایف سی بلوچستان تعیناتی آ مبارکباد
اسلام آباد۔ 25جنوری (اے پی پی) وزیر داخلہ چوہدری نثارعلی خان تون آئی جی ایف سی بلوچستان میجر جنرل ندیم احمد انجم اوڑدہی کرے۔ وزیر داخلہ میجر جنرل ندیم احمد انجم ئِ بطور آئی جی ایف سی بلوچستان تعیناتی آ مبارکبادی تس۔ اوڑدہی ٹی صوبہ ٹی امن و ایمنی نا حالیت و ایف سی آن تعلقدار معاملہ غاتیا خیال آتا درشانی کننگا۔ وزارت داخلہ نا کنڈآن جاری بیان نا رداٹ وزیر داخلہ پارے کہ ایف سی بلوچستان اٹی ریاست نا رٹ انا بحالی و امن و ایمنی نا اڈتننگ نا بابت کلیدی کڑد ادا کرینے۔ دا بابت ایف سی نا ہر افسر و ورنا نا کڑد ستاءکڑزک۔ اوپارے کہ تینا فرض انا انجام تننگ نا چرجوئی ٹی ایف سی نا غٹ گرج آتے پورو کننگک۔ بلوچستا ن ئِ پاکستان مخالف واک آتیان پاک کننگ تون اوار اوار بلوچستان نا الس نا است و دماغ ئِ کٹنگ نا زمواری ہم ایف سی آٹی ئِ۔ اوپارے کہ دشمن داوخت تینا آخریکو جنگ ئِ بلوچستان نا گل زمین ئِ کاریم اٹ اتسا کننگ خوائک۔ اودے مہالو ہم بے سہبی مسنے و داسہ ہم بے سہبی مریک۔ گدرینگوک آ منہ توتیٹی دا بابت ایف سی ہرا گام گیج آتے کرینے او است جم ئُ ولے اودے پین گچین جوڑ کننگ ناگرج ئِ و بیرہ سی پیک ہی آخا مچ آ بلوچستان ئِ پرامن جوڑ کننگ ننا غٹ انا اسیجائی زمواری ئِ ۔ اوپارے کہ گدرینگوک آ منہ ہفتہ تیٹی خلقت نا بھلو کچ اسے نا بیدادی نا کسر ئِ ہلسا قومی دنگ اٹی اوار مننگ نا عمل خوش آئند ئِ۔
