سیالکوٹ۔ 01مئی (اے پی پی) وزیراعظم نا خصوصی کمکار اطلاعات و نشریات ڈاکٹر فردوس عاشق اعوان پارینے کہ پاکستان تحریک انصاف نا حکومت پنجاب اٹی بھاز زوت پین ادارہ جاتی اصلاحات درستی راستی کرفک، پاکستان مسلم لیگ (ن) نا تدوک آ حکومت ریاستی ادارہ غاتے بھس کریسس، ساڑی حکومت دا ادارہ غاتے سوگو کننگ کن کاریم کننگ ءِ۔ چارشنبے نادے آ داڑے کوبے چک بجوات خلق اٹی میڈیا تون گپ و تران کرسا اوپارے کہ پنجاب اٹی پی ٹی آئی نا حکومت نا کنڈآن بلدیاتی نظام حکومت نا بابت کانود سازی صوبہ نا الس نا است خواہی تا عکاس ءِ، صوبائی حکومت دا وڑنا کانودسازی کرسا کیک۔ اوپارے کہ پاکستان مسلم لیگ (ن) نا سرکڑدہ تینا جندی فائدہ غاتے کن سیاست کننگ ءِ، (ن) لیگ نا حکمرانک تخت لاہور آ کوزہ کرسا قومی دولت ءِ ہڑتوم آ دوتے اٹ لٹ وپل کریر، و قومی ادارہ غاتے ہم نزور کریر۔ اوپارے کہ سندھ حکومت بیدس سمت اسے آن و اولیت آتا چلینگ انگ ءِ، سندھ انا حکمران جماعت پاکستان پیپلزپارٹی پی ٹی آئی نا بنجائی حکومت آ تنقید کننگ نا جاگہ غا تینا اولیت آتے طے کے۔ سندھ اٹی ایڈز انا ناجوڑی نا بابت آن حالیت آتیا اوپارے کہ سندھ اٹی دا ناجوڑی ترندی اٹ تالان مننگ ءِ و پوسکن ءُ کیس ہم مون آ بسنے۔ اوپارے کہ پیپلزپارٹی نا حکومت ایڈز ءِ کنٹرول کننگ اٹ تو بے سہب مسنے و داسہ پی ٹی آئی نا حکومت آ تنقید کننگ اٹ اختہ ءِ۔ اوپارے کہ بنجائی حکومت ایڈز ءِ کنٹرول کننگ اٹ سندھ حکومت ءِ پورو کمک فراوان کننگ کن تیار ءِ۔ او پیپلزپارٹی نا سرکڑدہ غاتے مشورہ تسن کہ او سندھ آ چکار کے و صوبہ نا الس ءِ مون تروک ویل آتے ایسر کننگ نا کوشست کے۔
