اسلام آباد۔ 01مئی (اے پی پی) دفترخارجہ نا ترجمان ڈاکٹر فیصل خان پارینے کہ پاکستان مدام اقوام متحدہ نا سلامتی کونسل نا پابندی کمیٹی نا سیاسی کاریم اٹ اتنگ نا مخالفت ءِ کرینے، ہرا تکنیکی قاعدہ و ضابطہ نا رداٹ دا فہرست اٹی بندغ آتا پن ءِ اوار کرسا کننگانے پاکستان مدام اونا شرف نا گرج آ زور شاغا، مولانا مسعود اظہر ءِ پلوامہ جلہو تون گنڈنگ، کشمیری تا جہد آجوئی ءِ بدنام کننگ نا کوشست آتے نن بے سہب کرین، پاکستان نا دا عزم ءِ کہ او تینا گل زمین ءِ اسہ ہم کالعدم تنظیم اسے نا کاریم اٹ اتنگ نا موکل تفک، مولانا مسعود اظہر نا پن ءِ اقوام متحدہ نا سلامتی کونسل نا پابندی کمیٹی نا فہرست اٹی اوار کننگانے۔ چارشنبے نادے آ دفترخارجہ ٹی میڈیا ءِ حوال ترسا ترجمان دفترخارجہ ڈاکٹر فیصل خان پارے کہ اقوام متحدہ نا سلامتی کونسل پابندی کمیٹی ٹی مولانا مسعود اظہر نا پن ءِ اوار کرینے۔ ہرانا رداٹ اوڑا پیشن نا سفر آ پابندی، اونا میرات آتے منجمد و ”آرمز ایمبارگو“ خلنگانے۔ اوپارے کہ 2009 ء آن پد کیہی سال آتسکان اقوام متحدہ نا پابندی تا کمیٹی ٹی مولانا مسعود اظہرءِ اوار کننگ نا بابت سجفنگاکہ۔ پاکستان نا انسداد دہشت گردی نا کانود نا رداٹ ہم گڑاس وخت اونا پن ءِ تجویز کرسا کننگا۔ اقوام متحدہ نا سلامتی کونسل نا پابندی کمیٹی پیدوار کانود و سخت تکنیکی معیار نا بنداو آ چلینگ انگ ءِ۔ کمیٹی نا غٹ فیصلہ غاک امنائی اٹ کننگرہ۔ کمیٹی نا وڑوڈول غٹ باسک آتے موکل ایتک کہ او تکنیکی بنداو تیا ہر معاملہ ءِ پین سجفنگ کن و معاملہ سے آ اجتماعی سمجھ بوجھ اسکان سرمننگ کن ودکی وخت ہلے۔ چندی بندغ آتا پن ءِ فہرست اٹی اوار کننگ نا بابت چندی ملک آک تکنیکی بنداو تیا وخت ہلکر۔ پاکستان مدام دا تکنیکی قاعدہ و ضابطہ نا شرف نا گرج آ زور شاغا و دا کمیٹی نا سیاسی بنداو تیا کاریم اٹ اتنگ نا مخالفت ءِ کرے۔ اوپارے کہ داکان مست سلامتی کونسل نا پابندی تا حامل کمیٹی مسعود اظہر آ اتفاق رائے ودی کننگ اٹ بے سہب مسوسس۔ انتئے کہ اوڑتون تعلقدار انفارمیشن تعلقدار تکنیکی آب آ پورو سلتوکہ۔دا سلاہ غاک پاکستان ءِ بدنام کننگ و کشمیری تا تسلیم شدہ حق خودارادیت نا جہد ءِ بدنام کننگ کن ئسر۔ پاکستان اوفتے مسترد کرے وپاکستان مدام گوندا کہ ہر کس کہ مرے اونا پن ءِ اوار کننگ نا قرارداد بایدے اتفاق رائے اٹ مرے و بامسخت مذاکرات و سلابت نا کمک اٹ بایدے مرے و داعمل 1267کمیٹی فریم ورک و سیاست آن پاک بایدے مرے۔
