اسلام آباد۔ 01مئی (اے پی پی) صدر مملکت ڈاکٹرعارف علوی پارینے کہ اینخو نا سال نن جہانی مزور دے ءِ دا عزم اتون اڈتننگ اُن کہ نن مزور آتا وقار کن پرعزم مرینہ و تینا بنداوی حق آتے کن مزور آتا تاریخی و دلیرانہ جہد ءِ خراج تحسین پیش کینہ۔ اوداخیال آتا درشانی ءِ جہانی مزور دے انا وخت آ تینا کلہو اٹی کرے ہرا اینو اڈ تننگ انگ ءِ۔ صدر مملکت پارے کہ دادے نئے بیرہ مزور آتا جہد نا یات ءِ ترفک بلکن قومی شونداری و شونہالی ٹی اوفتا اہمیت نا ہم اعتراف ءِ۔ اوپارے کہ ننے باورءِ کہ پیدواری عمل اٹ آجر و اجیر شریدار ءُ و اوفتا کمک صنعت نا کچ و ملک انا راجی و معاشی شونداری کن بے کچ المی ءِ۔ اوپارے کہ حکومت مزور آتے مون تروک ویل آتون مون تننگ کن ”احساس پروگرام“ نا بناءِ کرینے۔ پروگرام نا مسخت مزور آتا استحصال نا چٹفنگ و تنخواہ، جان جوڑی و رکھ انا بابت اوفتا حق انا شرف ءِ المی کروئی ءِ۔ اوداپت انا درشانی ءِ کرے کہ ساڑی دور حکومت اٹی مزور آتا حق انا گچین وڑاٹ رکھ ءِ کننگک تانکہ عالمگیریت مون آ بروک آ چیلنج آتون مون تننگ اٹ اوفتا کمک مننگ کیک۔ اوپارے کہ حکومت مزور آتا راجی ومعاشی حالیت آتے گچین کننگ کن تینا پبی کوشست آتے کیک۔ اوصوبائی حکومت آتیا زور شاغا کہ او ورکرآتا حق آتا رکھ اکن تینا گام گیج آتے ٹی ترندی اتیر۔ اوآجر اجیر آتیا زور شاغا کہ او مون آ بریر و پاکستان ءِ شون ہلوک کننگ اٹ تینا کڑد ءِ ادا کیر۔ اوپارے کہ ببو دادے انا موقع غا نن دعا کین و پاکستان نا شونہالی و عظمت کن اسہ وار ولدا عزم انا درشانی ءِ کین۔
