اوغانستان نا بڑزکو کہول انا ڈل انا وزیر خارجہ مخدوم شاہ محمود قریشی تون اوڑدہی

پاک اوغان تعلقداری، اوغان مفاہمتی عمل تون اوار تین پہ تینی است خواہی نا معاملہ غاتیا گپ و تران
اسلام آباد۔ 01مئی (اے پی پی) اوغانستان آن تعلق تخوک آ سیاست دان، صحافی، چاہندار تعلیم و کاروباری شخصیت آتیا تالان اسہ بڑزکو کہول انا ڈل اس وزارت خارجہ ٹی وزیر خارجہ مخدوم شاہ محمود قریشی تون چارشنبے نادے آ اوڑدہی کرے۔ اوڑدہی ٹی پاک اوغان تعلقداری، اوغان مفاہمتی عمل تون اوار تین پہ تینی است خواہی نا معاملہ غاتیا گپ و تران کننگا۔ ڈل اٹی ساڑی مروک آک اوغان امن عمل نا چرجوئی ٹی کڑدہ غاتے مذاکرات نا میز آ اتنگ کن پاکستان و خاص کر وزیر خارجہ نا عزم و کوشست آتا ستاءِ کریر۔ ڈل اوغانستان و پاکستان نا نیام اٹ پت سازی، ہڑتوم آ کنڈآتا سیاسی و واپاری کمکاری ءِ مون آ دننگ نا بابت تینا سلاہ تے وزیر خارجہ مخدوم شاہ محمود قریشی ءِ پیش کریر۔ داوخت آ وزیر خارجہ شاہ محمود قریشی پارے کہ ننے سوگو ءُ اومیت اسے کہ اوغانستان اٹی کیہی دہائی تیامحیط بدامنی نا چٹفنگ و امن کن ننا مخلصانہ کوشست آک سرسہبی اٹ ہمکنارمریرہ۔ وزیر خارجہ مخدوم شاہ محمود قریشی ڈل ءِ باوری کرفے کہ پاکستان ڈیہہ ٹی و خاص کر اوغانستان اٹی امن کن تینا کوشست آتے برجاتخک۔