پاکستان تحریک انصاف نا حکومت پوسکن آ پاکستان ءِ جوڑ کننگ اٹ خواری کش و کارندہ غاتے اسہ اہم ءُ شریدار اس تکک
اسلام آباد۔ 01مئی (اے پی پی) وزیراعظم نا خصوصی کمکار اطلاعات ونشریات ڈاکٹر فردوس عاشق اعوان پارینے کہ پاکستان تحریک انصاف نا حکومت پوسکن آ پاکستان نا جوڑ کننگ اٹ خواری کش و کارندہ غاتے اسہ اہم ءُ شریدار اس تکک و اوفتا راجی آسراتی و حق انا رکھ اکن عملی گام گیج کننگ ءِ۔ مزور آتا جہانی دے انا وخت آ چارشنبے نادے آ تینا اسہ بیان اسے ٹی اوپارے کہ خواری کش آک جہانی کہول آ شونداری ٹی تینا کڑد ءِ ادا کرینو۔ خصوصی کمکار پارے کہ ساڑی حکومت راج اٹی ورکنگ کلاس نا حق انا رکھ اکن گام گیج کیک۔ اوپارے کہ خواری کش آتا شونداری آن بیدس ملک انا شونداری مننگ کپک و وزیراعظم اوفتا حق آتا فراوانی ءِ المی کننگ کن جہد کننگ ءِ۔ اومستی پارے کہ ساڑی حکومت خواری کش تپہ ءِ ریاست مدینہ نا اصول آتا روشنی ٹی اوفتا حق فراوان کننگ کن ہروڑنا ممکنہ گام گیج کننگ ءِ۔ اوپارے کہ خواری کش آتا جہد جہانی تحریک ءِ و آجر و اجیر نا گچین تعلقداری راج انا شونداری نا بنداو ثابت مننگ کیک۔ اوپارے کہ وزیراعظم عمران خان راج انا غٹ تپہ غاتا راجی آسراتی کن گام گیج کننگ ءِ۔ ڈاکٹر فردوس عاشق اعوان مستی پارے کہ ”مزور نا احساس پروگرام“ خواری کش تپہ غاتا راجی رکھ ءِ المی کننگ کن مزل نا نشان مریک۔ وزیراعظم نا خصوصی کمکار پارے کہ ہمو وخت مر اف ہراتم پاکستان نا خواری کش تپہ شونہال مریک و اوفتے را ج اٹی باعزت ءُ ہند اس دوئی مریک۔
