اسلام آباد۔ 01مئی (اے پی پی) پاک فضائیہ نا سروک ایئر چیف مارشل مجاہد انور خان پارینے کہ 27 فروری 2019 ء آ دشمن بھارت نا جارحیت نا ورندی ٹی پاکستان ایئر فورس نا ردعمل ءِ تاریخ اٹی ”آپریشن سوفٹ ری ٹارٹ“ نا پن اٹ یات تخنگک۔ اوداخیال آتا درشانی ءِ چارشنبے نادے آ داڑے پی اے ایف ہیڈ کوارٹرز اٹی 264می ایئر اسٹاف پریزنٹیشن نا دود آن تران کرسا کرے۔ پریس ریلیز نا رداٹ ایئر چیف پارے کہ نن بے کچ عاجزی اٹ پانہ کہ اللہ تعالیٰ ساڑی آ پاک بھارت بے چیٹی تیٹی بھارتی جارحیت نا گچین ءُ ورندی اس تننگ نا موقع اس تس و نن قوم انا اومیت آتیا پورو سلیسونن۔ اوپارے کہ پی اے ایف نا سوفٹ ردعمل ننا لائخی و قابلیت نا عملی ءُ درشانی ئس اس کہ نن ہر حالیت آتا گچین مقابلہ ءِ کننگ کن پرعزم و تیار اُن۔ پاک فضائیہ نا کارندہ غاتا جوزہ نا ستاءِ کرسا مجاہد انور خان پارے کہ پی اے ایف نا ہر آفیسر و ورناخصوصی سفت نا حقدار ءُ۔ اوامتحان نا ساہت اٹ فارورڈ آپریٹنگ بیس آتیا تعینات عملہ ءِ سوگو عزم، صبر و حوصلہ نا درشانی ءِ کننگ آ سیلوٹ پیش کرے۔ بیان نا رداٹ پاک فضائیہ نا سروک دا عزم انا اعادہ ءِ کرے کہ دشمن نا کنڈآن ہرجارحیت نا حالیت اٹ ننا ورندی مست آن زیات سخت مریک۔ ایئر چیف چندی بشخ آتے ٹی شاندار کارکڑدگی نشان تروک آتے ٹی انعام ہم بشخ وپانٹ کرے۔ داوخت آ ”ٹریننگ اینڈ فلائیٹ سیفٹی“ ٹی گچین کارکڑدگی آ پی اے ایف بیس شہباز وخت اس کہ پی اے ایف بیس مصحف ءِ ”سٹرانگ مین“ ٹرافی نا اعزاز تس۔ گراؤنڈ سیفٹی نا ٹرافی پی اے ایف بیس پشاور ءِ تننگا۔ پاک فضائیہ ہر مسہ تُو آن پد تینا کچ اٹ گچینی و آپریشنل تیاری تا جاچ ءِ ہلنگ کن خصوصی پروگرام اڈ ایتک۔
