اسلام آباد۔ 01مئی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ خواری کش و کارندہ تپہ غاک قومی معیشت نا سوگوی و ملک انا شونداری ٹی کلیدی ءُ کڑد اس ادا کیرہ۔ چارشنبے نادے آ یوم مئی نا مناسبت اٹ اسہ نجی ٹی وی چینل اسے تون گپ و تران کرسا اوپارے کہ خواری کش تپہ ءِ واکدار کننگ آن بیدس راج اٹی باعزت ءُ ہند اس ترفنگ آن بیدس مالیاتی ہدف آتے دوئی کننگ مفک۔ عثمان ڈار پارے کہ یوم مئی خواری کش آتا قربانی تے امنا کننگ نا دے ءِ ہرا ملکی شونداری نا کلیدی کڑد ءِ۔ اومستی پارے کہ قومی شونداری ٹی کڑد ادا کننگ آ اینو نن نرینہ و نیاڑی کارندہ غاتا کارکڑدگی ءِ خراج تحسین پیش کننگ اُن۔ اوپارے کہ ساڑی حکومت وزیراعظم عمران خان نا کماشی ٹی مزور دوست پالیسی مرتب کننگ ءِ تانکہ ملک انا خواری کش تپہ غاتا راجی آسراتی ءِ المی کننگ مرے۔ اوپارے کہ مزور آتا عزت و شرف نا ننا جوزہ بے مثل ءِ انتئے کہ نن باور کینہ کہ شونہال و فریشانی تیان آجو افرادی واک ہی جہانی معیشت نا دا دور اٹی پاکستان ءِ اونا کچ انا رداٹ گچین ءُ ہند اس ترفنگ کیرہ۔ اوپارے کہ غٹ شریدار آتا کمک و سلابت اٹ ورکنگ کلاس نا گچینی کن گام گیج کننگک تانکہ راج انا غٹ تپہ غاتے بریبر وارخواہی دوئی مرے۔ اسہ سوج اسے نا ورندی ٹی اوپارے کہ قومی احتساب بیورو وتواجہ ءُ ادارہ اسے و حکومت نیب اٹی ہچ ءُ وڑاسے نا نیام تمنگ ءِ روادار کپک۔ اوپارے کہ اپوزیشن جماعت آک احتساب نا عمل اٹ پین شفافیت کن پبی سلاہ ایتر۔ عثمان ڈار پارے کہ کرپشن آن پاک پاکستان پی ٹی آئی نا منشور ءِ و دامسخت کن الس پارٹی ءِ مینڈیٹ تسنے۔
