اسلام آباد۔ 30 اپریل (اے پی پی) وزیراعظم آزاد کشمیر راجہ فاروق حیدر خان آزاد کشمیر نا غٹ سیاسی سرکڑدہ غاتے سلہ خلک کہ او کشمیر نا ویل ءِ تالان کننگ کن اسہ پلیٹ فارم اسے آ مچ مریر، کشمیری تا آجوئی نا جہد ءِ دہشت گردی تون گنڈنگ آن بھارتی بیانیہ نا دنیا نا مون آ توڑ اس کروئی مریک، مقبوضہ کشمیر نا بھارت تون الحاق ءِ سلامتی کونسل مسترد کرے، آزاد کشمیر نا حکومت نا کشمیر نا آجوئی نا بابت کڑد ءِ متعین کروئی مریک، آزاد کشمیر ءِ انتظامی اعتبار اٹ دنیا کن مثال اس کننگ کینہ۔ او سے شنبے نا دے آ داڑے جموں کشمیر ہاؤس اٹی کشمیر سیل و جموں کشمیر حق خودارادیت انٹرنیشنل نا کنڈآن اڈ ہلوک آ سیمینار آن تران کریکہ ہرانا سرحال ”کشمیر نا ویل و اوورسیز کشمیری تا کڑد“ ئس۔ اوکان پد او اوورسیز کمشنر نا بنداو ءِ ہم تخا۔ سیمینار آن راجہ نجاہت حسین، فداحسین کیانی، نسیمہ وانی، راجہ زبیر کیانی ئسک ہم تران کریر وخت اس کہ سیمینار اٹی بھلو کچ اسے ٹی پیشن نا ملک آن اوورسیز کشمیریک بشخ ہلکر۔ وزیراعظم آزاد کشمیر پارے کہ اسہ ارب 30 کروڑ نابھلا ملک مننگ نا خاطر دنیا نا مون آ بھارت نا بیانیہ زیات چلینگک، ننے دا بیانیہ نا تدارک ءِ کروئی ءِ و اوورسیز کشمیری تے داڑکن تینا کڑد ءِ ادا کروئی مریک۔ اوپارے کہ واک انا کاریم اٹ اتنگ نا حق ریاست ءِ مننگ نا بیانیہ ایسٹ تیمور و سوڈان اٹی انت اکن امنا کننگتو۔ اوپارے کہ کشمیر نا ویل اٹی اوورسیز کشمیری تا کڑد بے کچ اہم ءِ۔ مسلم حکمرانک تینا بیوقوفی اٹ تینا ملک ءِ بھس کرفیر۔ ننا موقف پیدوار ءِ کہ بھارت کشمیر آن پیش تمے۔ اقوام متحدہ کشمیر نا بابت کمیشن اس جوڑ کے۔ اوورسیز کشمیری تے ہموجاگہ نا قومی سیاست اٹی بشخ ہلنگ ناگرج ءِ۔ ننا خواری ہمووخت آ رنگ اس اتیک ہراتم جہانی میڈیا ننا موقف ءِ تالان کے۔ کشمیر نا ویل ءِ تالان کننگ کن فلسطین وڑآ ننے تینا چناتتون اوار جہد کن پیش تموئی مریک۔ اوورناتیا زور شاغا کہ او سوشل میڈیا نا کمک اٹ کشمیر نا ویل ءِ تالان کیر۔ یورپی ملک آتا زموارآتے ای میل نا کمک اٹ تینا موقف ءِ سرکننگے۔
