تمباکو نوشی، کینسر، است انا مرض و ادرنگ نا سوب مریک، بنجائی حکومت دانا توننگ کن پرعزم ءِ، وزیر مملکت جان جوڑی ڈاکٹر ظفر مرزا

اسلام آباد۔ 30اپریل (اے پی پی) وزیر مملکت جان جوڑی ڈاکٹر ظفر مرزا پارینے کہ بنجائی حکومت تمباکو نوشی نا توننگ و دانا چٹفنگ کن پرعزم ءِ، تمباکونوشی کینسر، است انا مرض و ادرنگ نا سوب مریک، تمباکونوشی پاکستان اٹی سالانہ 160,000 بندغ آتا مرک انا سوب مریک۔ تمباکونوشی نا توننگ نا کانود آ عملدرآمد ءِ المی کرسا خلقت نا زند ءِ بچفنگ مریک۔ مچ آ ملک اٹی انسداد تمباکو نوشی کانود خاص وڑاٹ تمباکو مصنوعات آتے مشتہر کننگ نا گائیڈ لین تیا عملدرآمد ءِ المی کننگ کن وزارت قومی جان جوڑی ہر چار آ صوبائی چیف سیکرٹری و چیف کمشنر اسلام آباد ءِ دمدستی کننگ نا درخواست کرینے۔ تینا اسہ چھٹی اسے ٹی سیکرٹری وزارت قومی جان جوڑی پارے کہ سگریٹ جوڑ کروک آ کمپنیک تمباکومصنوعات آتا تحائف، پیکٹ اس ہلنگ آ پیسہ واپس، جتا کیش آفر و ایلو ذریعہ اٹ مصنوعات آتے مشتہر کرسا کانود نا خلاف ورزی ءِ کننگ ءُ۔ 2002 نا انسداد تمباکو نوشی کانود نا رداٹ تمباکو نا مصنوعات آتے پرنٹ، الیکٹرانک و بل بورڈ یا پین ذریعہ اٹ پیشن نا ہند آتیا مشتہر کننگ مفک۔ پین تمباکو نا مصنوعات آتے تحائف پیکٹ ہلنگ آ کیش انا پدی تننگ و مارکیٹ ریٹ آن کم نہاد اٹی بہا کننگ آ پابندی ءِ۔ ایس آر او 1068 و 46 نا رداٹ صوبائی حکومت آک و چیف کمشنر اسلام آباد تینا علاقہ غاتے ٹی تمباکونوشی نا توننگ نا کانود آ عملدرآمد کرفنگ نا زموار ءُ۔ کانود نا رداٹ خلاف ورزی آ اے ایس آئی یا اوڑان بڑزانا کارندہ کانودی کارروائی کننگ کیک۔ ہنداخاطران صوبائی حکومت آک و چیف کمشنر اسلام آباد ءِ درخواست کننگانے کہ کانود آ عملدرآمد ءِ المی کیر۔