اسلام آباد۔ 30 اپریل (اے پی پی) صدر مملکت ڈاکٹر عارف علوی راجی و اقتصادی شونداری کن علم و پٹ وپول نا اہمیت ءِ تالان کرسا پارینے کہ پٹ وپول و علم انا پوسکن ءُ کسر پٹوک آ قومک ترندی اٹ شونداری نا مزل ءِ طے کیرہ، ملکی جامعہ غاک پٹ وپول نا بشخ آ خصوصی چکار کرسا ورناتے آخبت اٹی روزگار اٹی کمکاری و مارکیٹ نا خواست آتون ہم گرنچ تعلیم آن آراستہ کیر۔ داخیال آتا درشانی ءِ او سے شنبے نادے آ بحریہ یونیورسٹی نا 21می کانووکیشن آن تران کرسا کرے۔ صدر مملکت پارے کہ قرآن پاک مچ آ دنیا کن بے مثل فلسفہ حیات ءِ و اونا سوب 1400 سال مست خلقت نا زند اٹی ہرا انقلاب بس او ہم غٹ اکن مشعل راہ ءِ۔ اوپارے کہ اسلام غٹ اختہ مروک آ تپہ و اقلیت آتے اوفتا حق ءِ تس ہرانا مثال تاریخ اٹی داکان مست ملیپک۔او پارے کہ طالب علم آتے کن لمہ و باوہ و راج تربیت جاہ ءُ۔ طالب علم آک تینا استاد آتیان علم انا کوڑی آن فائدہ ہرفرہ و تینا تعلیم ءِ پورو کننگ آن پد روزگار دوئی کننگ اٹ دا علم اوفتے کن کمکار مریک۔ صدر پارے کہ لمہ و باوہ تینا چناتا تعلیم آ چکار کرسا ہرازرکاری ءِ کیرہ او نئے بیرہ طالب علم بلکن ملک و قوم اکن ہم فائدہ تروک مریک۔ داسہ دا ورناتا زمواری مریک کہ او تینا لمہ و باوہ نا است خواہی تیا پورو سلر، اوفتاخیال ءِ تخر انتئے کہ لمہ و باوہ نا خیال ءِ تخنگ ننا فرض مریک۔ اوپارے کہ دنیا ترندی اٹ شون ہلنگ ءِ۔ مہالوو نن اسیجا خاہوتی نظام اٹی گنڈوک ئسن ولے داسہ ترند رفتار شونداری نا سوب انفرادی کلچر ءِ مون آ دننگ انگ ءِ ولے اوکان پد ہم پاکستانی کلچر گچین ءِ ہراڑے داسہ ہم خاہوتی نظام بھلو حد اسسکان برقرار ءِ۔ اوپارے کہ تینا دودوربیدگ و روایت آتیا چلینگ انگ بے کچ اہم ءِ۔ صدر پٹ وپول و تعلیم نا بشخ انا اہمیت ءِ تالان کرسا پارے کہ پٹ وپول و علم ءِ پٹوک آ قومک شون ہلیرہ و علم آ دسترس تخرہ ولے اگہ او پٹ وپول نا بشخ اٹی قابل قدر سرسہبی دوئی کپسہ او برتری دوئی کننگ کپسہ۔ اوپارے کہ علم انا پوسکن ءُ کسر پٹوک آ قومک شون ہلیرہ، علم انا دوئی و پٹ وپول قوم تا شونداری نا بنداو ءِ۔ ڈاکٹر عارف علوی داہیت آ زور شاغا کہ یونیورسٹیک پٹ وپول انا بشخ آ خصوصی چکار کیر۔ جامعہ غاتے ٹی پٹ وپول نا عمل پدریسہ بایدے برجاسلے۔ جامعہ غاک ورناتے ہندن ءُ تعلیم اس ایتر ہراڑان او تینا تعلیم ءِ پورو کننگ آن پد روزگار دوئی کننگ نا قابل مننگ کیر۔ اوپارے کہ ورناتے مارکیٹ اٹی طلب نا رداٹ تعلیم بایدے تننگے۔ اوپارے کہ ننے تینا تعلیمی نظام ءِ پوسکن آ وڑوڈول آتیا بایدے اتوئی مرے۔ صدر کتب بینی ءِ مون آ دننگ آ زور شاغسا پارے کہ ننا دور اٹی کتاب آتا بھلو اہمیت اس مسکہ ولے داسہ انفارمیشن ٹیکنالوجی نا انقلاب نا سوب معلومداری تا ذریعہ غاک بھلن مسنو۔ آن لائن معلومداری نا کوڑی ساڑی ءِ۔ اوورناتے پنت و شون کرے کہ او زیات آن زیات معلومداری دوئی کننگ کن دا کوڑی تیان فائدہ ہرفر۔ صدر پارے کہ اودے طالب علمی نا زمانہ ٹی کتب بینی نا شوق مسنے و او کتاب آتا کمک اٹ زیات آن زیات معلومداری دوئی کننگ نا کوشست کیک۔ اوپارے کہ چنکی آن دروغ تڑپننگ و راست پاننگ نا تربیت تننگک ہنداخاطران نن مدام بایدے راست پان۔ اوپارے کہ نن پہہ مرینہ کہ اگہ نن تون کس اس خرین ءُ ہیت اس کیک تو اوڑان ننا انا زہمی مریک۔ داکان مست صدر مملکت تدریسی پڑ اٹی نمان سرسہبی دوئی کروک آ طالب علم آتے ٹی سند و اعزاز ہم بشخ وپانٹ کرے۔
