اسلام آباد۔ 30 اپریل (اے پی پی) وزیر خارجہ شاہ محمود قریشی پارینے کہ پاکستان اوغانستان اٹی امن کن امن عمل اٹی امریکہ نا غٹ تر کمکاری ءِ کننگ ءِ، انٹرا اوغان ڈائیلاگ نا کمک اٹ ہی معاملہ غاتے سہی کننگ مریک، پاکستان طالبان و امریکہ نا براہ راست مذاکرات نا مخ تفی ءِ کرے، نن سمجھنہ کہ دوحہ و قطر انا مذاکرات نا جوان ءُ بھرم اس مون آ بریک، اوغان الس نا حق ءِ او انت کہ فیصلہ اس کیر، بدبختی داتُو دوحہ ٹی مروک آ مذاکرات ملتوی مس، اوغانستان ایشیاء نا است ءِ۔ نن اوغانستان نا غٹ آن بھلا اقتصادی شریدار اُن۔ داخیال آتا درشانی ءِ او سے شنبے نادے آ تھنک ٹینک آرپی آئی نا کنڈآن پاک اوغان ٹریک ٹو ڈائیلاگ سیمینار آن تران اٹی کرے۔ شاہ محمود قریشی پارے کہ پاکستان و اوغانستان نا نیام اٹ ٹریک ٹو المی ءِ، اوغانستان پاکستان کن بھاز اہمیت تخک۔ اوغانستان تون گچین تعلقداری ننا اولیت ءِ۔ اوغانستان پاکستان ایکشن پلان فار پیس ءِ لاگو کروئی مریک تانکہ پت سازی ٹی کمک ملنگ کے۔ اوپارے کہ اوغانستان اٹی امن اوغانستان نا تینا خلقت نا کمک اٹ ہی بننگ کیک۔ پاکستان اوغانستان اٹی امن کن امن عمل اٹی امریکہ نا غٹ تر کمکاری ءِ کننگ ءِ۔ انٹرا اوغان ڈائیلاگ نا کمک اٹ ہی معاملہ غاتے سہی کننگ مریک۔ اوپارے کہ ٹریک ٹو ڈائیلاگ اسہ اہم ءُ فورم اسے۔ نن دانا است بڈی ءِ کینہ۔ اوغانستان پاکستان کن اہم ءُ ملک اسے۔ اوپارے کہ دانا تاریخی پس منظر و جغرافیہ اہمیت تخک۔ کنا اولیکو دورہ کابل نائسک۔ گدرینگوک آ ہشت تُو اٹی اِرادورہ کریٹ۔ اوغانستان نا ویل انا ایسری سیاسی ءِ۔ شاہ محمود قریشی پارے کہ پاکستان طالبان و امریکہ نا براہ راست مذاکرات نا مخ تفی ءِ کرے۔ علاقائی تعلق نا سوب آن اوغانستان خاص اہمیت تخک۔ پاکستان اٹی مسہ ملین اوغان باہوٹ ءُ ننن اوغانستان نا غٹ آن بھلا اقتصادی شریدار اُن۔ اوپارے کہ کابل پشاور موٹروے و ٹائی پی گیس پیپ لین آن اوغانستان تون رابطہ ٹی ودکی مریک۔ نن اوغانستان اٹی ارب آ مالیت نا ڈٹ آتیا کاریم کننگ اُن۔ محمد علی جناح ہسپتال اونا اہم ءُ کڑی اسے۔ پنجا ہزار اوغان طالب علم پاکستان نا تعلیمی ادارہ غاتے ٹی تعلیم دوئی کرینو۔ اوغانستان اٹی پشتون تیان بیدس ہم خلقت آک رہینگرہ و المی ءِ کہ غٹ اوار تولر۔شاہ محمود قریشی پارے کہ ننا آخبت اٹ مون آ ہِننگ اسہ ایلو تون گنڈوک ءِ۔ ننے اینو داہیت انا فیصلہ ءِ کروئی ءِ کہ نن ہمرو آخبت اس خوانہ۔ ہراتم اوغانستان اٹی جنگ مس تو پاکستان ملوک آ است اٹ اوغان ایلم تے تینا کرے۔ اوپارے کہ ولدا وخت بدل مس و اسہ ایلو آ دوبہ خلنگ نا چرجوئی بناکرے۔ ای پاکستان و اوغانستان نا ٹیم تا نیام اٹ کرکٹ نا سیریز آتے ہم ہُننگ خواوہ۔ اوپارے کہ ای قطب آن سویل اسکان توانائی نا وسیلہ غاتے ہُننگ خواوہ ہراڑان پاکستان و اوغانستان ہڑتوم آک فائدہ ہرفنگ کیر۔ علاقائی کونیکٹیویٹی ءِ ہُننگ خواوہ، ننے اوار واپار کروئی ءِ، اوار پول و روڈ جوڑ کروئی ءِ۔ اوپارے کہ نن وڈی خوری نا برخلاف اسیجا جہد کروئی ءِ۔ ای چین نا دورہ غان پدی بسونٹ۔ ای خواوہ کہ بروک آ بی آر ایف اٹی کنا اوغان ہم منصب اوار تولوک مرین و داتغ و روشنا آخبت نا بشخ مرین۔
