اسلام آباد۔ 30 اپریل (اے پی پی) وزارت اوورسیز نا ماتحت ادارہ اوپی ایف وزیراعظم نا بچت و سادگی مشن نا رداٹ 12ودکی گاڈی تے نیلام کرے۔ خصوصی کمکار سید ذوالفقار بخاری محکمہ نا منیجنگ ڈائریکٹر عامر شیخ نا کوشست آتا ستاءِ کرے۔ نیلامی آن او پی ایف ءِ 71لکھ روپئی ملا وخت اس کہ او پی ایف نیلامی آن پد فیول نا مد اٹی سالانہ 18.5 لکھ روپئی بچفک۔ گاڈی تا جوڑ جاڑ نا مد اٹی 13.5 لکھ انا سالانہ بچت مریک۔ وزیراعظم نا خصوصی کمکار ذلفی بخاری پارے کہ نیلامی آن ملوک آ پیسہ غاتے اوورسیز پاکستانی تا راجی آسراتی کن خڑچ کننگک۔ وزیراعظم نا وژن نا رداٹ ادارہ غاتے ٹی سادگی ءِ مون آ دننگ اُن۔ اوپارے کہ ادارہ غاتے ٹی شفافیت ننا عزم ءِ، بچت و سادگی داوخت آ ملک اکن بھاز المی ءِ، بچت ءِ قومی فرض انا وڑاٹ بایدے ہُننگے۔
