دیرینہ دوستانہ تعلقداری تے سیاسی و معاشی بشخ آتے ٹی پین سوگوی تننگ آ امنا
اسلام آباد۔ 29اپریل (اے پی پی) پاکستان و تیونس دیرینہ دوستانہ تعلقداری تے سیاسی و معاشی بشخ آتے ٹی پین سوگوی تننگ آ امنا کرینو۔ داہیت ءِ چیئرمین سینیٹ محمد صادق سنجرانی تون تیونس نا سفیر عادل العربی نا اوڑدہی ٹی پاننگا۔ تیونس نا سفیر دوشنبے نادے آ پارلیمنٹ ہاؤس اٹی چیئرمین سینیٹ محمد صادق سنجرانی تون اوڑدہی کرے۔ داوخت آ گپ و تران کرسا چیئرمین سینیٹ پارے کہ ہڑتوم آ ملک آتا نیام اٹ تعلقداری اسیجا تاریخی، دودوربیدگی قدر، روایت و عقیدہ نا بنداو تیا قائم ءُ و ہڑتوم آ ملک آک اہم علاقائی و جہانی معاملہ غاتیا گیشتر اسیجا موقف اس تینا کرینو۔ چیئرمین سینیٹ داہیت آ زور شاغا کہ الس نا کہول آ رابطہ غاتے ودفنگ، سیاسی، معاشی و دودوربیدگی بشخ آتے ٹی تعلقداری تا مون آ دننگ کن ہڑتوم آ ملک آتا نیام اٹ ڈل آتا ہن وبر نا گرج ءِ۔ اوپارے کہ واپاری و معاشی تعلقداری دا چرجوئی ٹی کچ اتون مماثلت تخپسہ۔ اوپارے کہ ہڑتوم آ ملک آتا نیام اٹ پارلیمانی رابطہ و ادارہ جاتی کمکاری ءِ مون آ دننگ نا گرج ءِ۔ ہڑتوم آ ملک آتا پارلیمان اسہ ایلو نا آزموندہ غاتیان فائدہ ہرفنگ کن جتا ءُ پروگرام تشکیل ایتر ہراڑان نئے بیرہ پارلیمانی نمائندہ بلکن اسٹاف نا کاریم نا کچ ءِ ودفنگ نا ہم وارخواہی ودی مریک۔ چیئرمین سینیٹ ہڑتوم آ ملک آتا پارلیمان اٹی سنگتی پڑک آتے فعال کننگ نا گرج آ زور شاغا۔ تیونس نا سفیر چیئرمین سینیٹ نا خیال آتیان امنا کرے و پارے کہ ننے ہڑتوم آ کنڈآتا تعلقداری تے مون آ دننگ کن پوسکن ءُ کسر پٹوئی مرے۔ اوپارے کہ تیونس چندی بشخ آتے ٹی پاکستان تون ہڑتوم آ کنڈآتا کمکاری ءِ ودفنگ نا است خواہ ءِ۔
