لسبیلہ۔ 29 اپریل (اے پی پی) وزیراعلیٰ بلوچستان جام کمال خان پارینے کہ پوسکن آ و کسبی تعلیم آن صوبہ ءِ شون ہلوک کننگ کینہ، ادارہ غاتے سہی کروئی ءِ، ننا نصب العین ءِ، خاص کر ایجوکیشن، جان جوڑی، کشت وکشار، لائیو اسٹاک و ایلو محکمہ غاتے سہی ڈگر آ اتوئی ءِ، ساڑی حکومت 500 اسکیم ہرا ہشت و دہ سال آن ناپورو ءُ ہرافتے دا جون اسکان پورو کننگک۔ وخت آ پورومفننگ آن دا ڈٹ آتا جوڑ جاڑی خڑچ آک ہم ودانو وخت اس کہ الس ہم دا اسکیم تا بھرم تیان فائدہ ہرفنگ کتنو۔ دوشنبے نادے آ اوتھل اٹی بلوچستان ریزیڈیشنل کالج و گورنمنٹ پولی ٹیکنیک انسٹیٹیوٹ فار بوائز نا بنائی دود آن تران کرسا وزیراعلیٰ بلوچستان جام کمال پارے کہ مستین نا حکمران تا ہیبدار ڈٹ بندی آن صوبہ نا گیشتر بھلا ڈٹ آک نیم گڈلو ءُ، کیہی اسکیمک کتاب آتے ٹی تو پورو ءُ ولے وخت اس کہ راستکیک اوفتیان جتا ءُ، الس نا خراج آن جوڑ مروک آ اسکیمک ہشت دہ سال آن ناپورو ءُ، ننا مشن بلوچستان نا الس کن اجتماعی بھلا اسکیم کون آ ڈیم، ٹرانسمیشن لین و ایلو ڈٹ آتے صوبہ ٹی کرسا اوفتا زند انا آب ءِ بڑزکروئی ءِ وخت اس کہ چنکا اسکیم تے ضلع تینا وسیلہ غاتیان جوڑ کیک، اوپارے کہ محکمہ تعلیم اٹی بیست آن بیست ءُ پنچ ہزار آسامی و ایلو محکمہ غاتے ٹی ہم سد آ آسامیک خورک ءُ اوفتے پُر کننگک و پین آسامی ودی کننگک ہراڑان بے روزگاری حد اسسکان چٹک۔ وزیراعلیٰ بلوچستان جام کمال خان پارے کہ اگہ بلوچستان ریزیڈنشل کالج و پولی ٹیکنیک انسٹیٹیوٹ 2005 ء ٹی تینا وخت آ پورو مسرہ تو دا ادارہ غاتیان اسہ ہزار چناکسب کار مرسا پیش تمارہ و صوبہ نا شونداری ٹی اہم ءُ کڑد اس ادا کریرہ، اوپارے کہ دا ننا بدبختی ءِ کہ 2003و 2004ء نا بھلا بھلا ڈٹ آک داسکان پورو افس صوبہ داہیت انا متحمل مننگ کپک کہ الس نا خراج آن دوئی مروک آ زر آک کرپشن نا گواچی مریر، نن دا اسکیم آتے وخت آ پورو کینہ تانکہ الس نا زند انا آب بڑز مرے، اومستی پارے کہ ہراوخت اسکان نن جوان وڑاٹ ڈٹ بندی کپنہ ہمووخت اسکان شونداری و شونہالی نا تغ پورو مفک، مستین نا حکمران تا غلط پالیسی تا بھرم ءِ نن کُننگ اُن، مچ آ بلوچستان نا شونداری کنا اولیت ءِ۔ اوپارے کہ ننا حکومت ہر ضلع ٹی پرائمری، مڈل اسکول جوڑ کیک وخت اس کہ ہائی اسکول آتے ٹی انٹرمیڈیٹ کلاس آتا بناءِ کننگک و متکن آ ماڑی تے سہی کننگ تون اوار اوار دا اسکول آتے غٹ آسراتی تیان آراستہ کننگک، آبادی نا جاگہ غا رقبہ نا لحاظ اٹ اسکول جوڑ کینہ تانکہ مر مر انگا و پدسلوک آ علاقہ غاتا چناک ہم تعلیم دوئی کننگ کیر۔ داوخت آ صوبائی وزیر داخلہ میر ضیاء لانگو، صوبائی وزیر لائیو اسٹاک مٹھاخان، ڈپٹی کمشنر لسبیلہ شبیر احمد مینگل، مسکوہی چیئرمین ڈسٹرکٹ کونسل لسبیلہ اکبر شیخ، وائس چیئرمین قادر بخش جاموٹ، ڈاکٹر تولہ رام لاسی و غٹ ضلعی آفیسرآک ساڑی ئسر۔ ایسر اٹی وزیراعلیٰ بلوچستان جام کمال خان ضلع لسبیلہ نا شار لاکھڑاءِ میونسپل کمیٹی اس جوڑ کننگ ناہم پڑو ءِ کرے۔
