اسلام آباد۔ 29اپریل (اے پی پی) وزیراعظم عمران خان نا چین نا 4دے ئی سرکاری دورہ پورو مس، وزیراعظم چین نا صدر شی جن پنگ نا سلہ غا ارٹ میکو بیلٹ اینڈ روڈ فورم و بیجنگ انٹرنیشنل ہارٹیکلچر نمائش 2019 ء نا بنائی دود اٹی بشخ ہلک۔ دفترخارجہ نا ترجمان نا کنڈآن دوشنبے نادے آ جاری اعلامیہ نا رداٹ وزیراعظم عمران خان 25 آن 28 اپریل اسکان چین نا سرکاری دورہ ءِ کرے۔ وزیراعظم 26اپریل آ بیلٹ اینڈ روڈ فورم نا بنائی دود آن کلیدی تران کرے۔ اوچینی صدر شی جن پنگ نا کنڈآن ہندا شام جہانی راہشون تا شرف اٹی تروک آ ضیافت اٹی ہم بشخ ہلک۔ 27اپریل آ وزیراعظم جہانی راہشون تا گول میز کانفرنس نا اولیکو سیشن آن ہم تران کرے۔ دا گول میز کانفرنس نا سرحال ”رابطہ غاتے ٹی ودکی نا کمک اٹ شونداری نا پوسکن آ وسیلہ غاتا پٹنگ“ ئس۔ تینا بیان اٹی وزیراعظم بیلٹ اینڈ روڈ کمکاری کن 4پوسکن آ علاقہ غاتا پیدواری ءِ کرے۔ دافتے ٹی ڈیجیٹل رابطہ، افرادی واک انا گدریفنگ، دودوربیدگی رابطہ و علم و احیاء کن اسہ ایلو نا آزموندہ غاتیان فائدہ ہرفنگ اوار ءِ۔ وزیراعظم تون اوار بنجائی وزیر آک و بڑزکو سرکاری کمامدارآک ہم ڈل اٹی اوار ئسر۔ وزیراعظم و اونا ڈل نائب صدر و اووان کی شان نا کنڈآن تروک آ ضیافت اٹی بشخ ہلکر۔ وزیراعظم چینی صدر شی جن پنگ و وزیراعظم لی کی چیانگ تون 28 اپریل آ اوڑدہی کرے۔ دا اوڑدہی تیٹی ہڑتوم آ کنڈآک سی پیک تون اوار تین پہ تینی کمکاری نا جم اٹنگا کہول انا جاچ ءِ ہلکر۔ ہڑتوم آ کنڈآک دا عزم انا اعادہ ءِ کریر کہ ہر موسم اٹی آزموندہ تزویراتی کمکاری نا شریداری ءِ پین سوگو کننگک۔ ہڑتوم آ کنڈآک اہم علاقائی و جہانی معاملہ غاتیا ہم گپ و تران کریر ہرافتے ٹی اوغانستان اٹی امن و مفاہمت، سویلی ایشیا ٹی امن و سوگوی اوار ءِ و تعلقداری تے پین سوگو کننگ آ امنا کریر۔ چینی ہم منصب تون اوڑدہی و ہڑتوم آ ملک آتا نیام اٹ بھلو کچ اسے ٹی مفاہمتی یات داشت و معاہدہ غاتیا دستخط کننگا دافتے ٹی چین پاکستان آزادانہ واپار نا ارٹ میکو مرحلہ و ایم ایل ون نا معاہدہ اوارو۔ بیلٹ اینڈ روڈ فورم نا وخت آ وزیراعظم تاجکستان، ازبکستان، مصر، ملائیشیا، ایتھوپیا و جمہوریہ کرغز نا جہانی راہشون آتون اوڑدہی و ہیت وگپ کرے۔ داکان بیدس جہانی مالیاتی ادارہ نا منیجنگ ڈائریکٹر و ورلڈ بینک انا چیف ایگزیکٹو آفیسر آتون ہم اوڑدہی کرے وخت اس کہ داکان بیدس بیلٹ اینڈ روڈ فورم اٹی ساڑی کارپوریٹ و بزنس نمائندہ غاتون ہم اوڑدہی کرے۔ دورہ ٹی او بیجنگ ہارٹیکلچر 2019ء نا بنائی دود اٹی ہم بشخ ہلک ہراڑے صدر شی جن پنگ و ایلو جہانی راہشون آتون ہم گپ و تران کرے۔ وزیراعظم دا نمائش اٹی خلوک آ پاکستانی پویلین نا ہم دورہ ءِ کرے۔ دا نمائش بروک آ 5تُو اسکان برجاسلک۔ وزیراعظم عمران خان چائنہ انٹرنیشنل کلچرل کمیونیکیشن سنٹر و چائنہ پاکستان فرائنڈ شپ ایسوسی ایشن شپ انا کنڈآن تروک آ تینا شرف اٹی شام انا اِرغ اٹی ہم بشخ ہلک۔ 28 اپریل آ وزیراعظم چین پاکستان ٹریڈ و زرکاری فورم آن ہم تران کرے ہراٹی بھلو کچ اسے ٹی پاکستانی و چینی پوریاگرآک بشخ ہلکر۔ دافورم اٹی نیشنل پیپلز کانگریس نا وائس چیئرمین ژانگ چن ژیانگ ہم بشخ ہلک ہرانا مسخت پاکستان اٹی زرکاری و کاروبار نا پوٹینشل آن بشخ ہلوک آتے معلومدار کروئی ئسک۔ داکان بیدس فورم اٹی او کاروباری بندغ آتون اوڑدہی ہم کرے ہراٹی 14معاہدہ غاتیا دستخط مس۔ وزیراعظم تون اوار وزیر خارجہ، وزیر ڈٹ بندی، شونداری و اصلاحات، وزیر توانائی، وزیر ریلوے،وزیراعظم نا سلاہکار واپار و خزانہ، چیئرمین زرکاری بورڈ ہم اوار ئسر۔ دا وزیر و سلاہکار آک 25اپریل آ بیلٹ اینڈ روڈ تھیماٹک فورم اٹی پاکستان نا نمائندگی ءِ کریر۔ اوتینا چینی ہم منصب و وزیر آتون اوار اوڑدہی کریر۔ وزیراعظم نا چین نا دا ارٹ میکو دورہ ہراٹی اودے چینی سرکڑدہ غاتون تین پہ تینی و علاقائی معاملہ غاتیا گپ و تران نا موقع ملا۔ داوخت آ سی پیک نا ارٹ میکو مرحلہ غا عملدرآمد ہراٹی صنعتی کمکاری و راجی اقتصادی شونداری اوارے آ رابطہ و چینی کاروباری شخصیت و زرکارآتے پاکستانی مارکیٹ آتا پوٹینشل نا پٹنگ کن بٹنگ انگ اوار ئس۔ وزیراعظم نا دورہ و چینی سرکڑدہ غاتون اونا پبی گپ و تران آن اسہ وار ولدا آزموندہ ہرموسم اٹی تزویراتی شریداری نا اہمیت نا اعادہ مس کہ علاقہ و جہانی کہول آ مروک آ ہروڑنا بدلی تیان دا سنگتی زہمی مفک و داتعلقداریک پین سوگو مرسا ہِننگ ءُ۔
