اسلام آباد۔ 29 اپریل (اے پی پی) بنجائی وزیر داخلہ بریگیڈیئر (ر) اعجاز احمد شاہ پارینے کہ ملک ءِ سیکورٹی و دہشت گردی و معیشت تون اوار کیہی چیلنج آک مون تروک ءُ، نن سہی کسر اٹ مون آ ہِننگ اُن، بروک آ دیک مستین نا مقابلہ ٹی گچین مریرہ۔ دوشنبے نادے آ سنٹرل پولیس آفس و پولیس لین تا دورہ نا وخت آ میڈیا تون گپ و تران کرسا وزیر داخلہ پارے کہ وزارت نا منصب ءِ سنبھالنگ آن کنے مچ آ ذیلی محکمہ غاتا دورہ ءِ کروئی ءِ۔ غٹ آن مست اسلام آباد پولیس نا معاملہ غاتے ہُننگ کن دورہ غا بسونٹ۔ اوپارے کہ پولیس نا خرابی و خامی تیان غٹ ءِ سماءِ ولے اوفتا جوان انگا کاریم پردہ نا پد اٹ مریک۔ اوپارے کہ پولیس و اونا زیات ذکر مفک۔ اوپارے کہ نن سہی کسر آ ہِننگ اُن۔ ملک ءِ داوخت آ بھاز انگا چیلنج آک مون تروک ءُ۔ سیکورٹی نا ویل غٹ آن بھلو چیلنج اسے۔ دہشت گردی کیہی دروشم آتے ٹی ساڑی ءِ۔ معیشت نا ویل آک ہم ننا مون آٹو۔ نن حالیت آتا گچینی کن بایدے دعا کین۔ بروک آ دیک مستین نا مقابلہ ٹی جوان مریرہ۔ مسکوہی صدر مشرف نا وطن آ پدی بننگ نا حوال آتا بابت سوج انا ورندی ٹی اوپارے کہ ای ہم میڈیا ٹی خوانانٹ کہ او بننگ ءِ۔ گڑاس اخبار آتے ٹی لکھوک ءِ کہ بننگ ءِ و گڑاس لکھانو کہ بفننگ ءِ۔ سندھ اٹی امن و ایمنی نا بابت سوج انا ورندی ٹی اوپارے کہ 18 می ترمیم آن پد امن و ایمنی صوبائی ءُ معاملہ اسے۔ دا بارواٹ وزیراعلیٰ سندھ آن سوج کبو۔ اسلام آباد پولیس کن مراعات آتے ٹی ودکی نا بابت اسہ سوج اسے نا ورندی ٹی اوپارے کہ ہرگڑا پیسہ ٹی مفک۔ آفیسر آک اگہ ورناتے تینا اولاد آنبار سمجھر تو نتیجہ غاک بالکل جتا مریرہ۔
